fot. Bartek Wyrobek

Wywiad z Panym Grzegorzym – szkaciorzym ze Pszczyny

Łod jak downa gro Pan w szkata?

Jo już grom ze czterdzieści lot spokojnie. Zaczołech grać, jak miołech dwanoście lot. I drugi czterdzieści jeszcze chca pograć. To zatrzymuje skleroza, bo trzeja myśleć.

Skąd dowiedzioł się Pan ło tyj grze?

Łodkąd pamiętom ojciec groł w szkata z prałatym Kuczerą. Łod szóstej we wieczór do szóstej rano. Prałat padoł przed szóstą rano: Chopy muszymy kończyć, bo mom zaroz mszo.  I my bajtle patrzyli jak starzi grają. Łociec niy chcioł nos nauczyć. Uczyło się poza domym. Nojprzód żech groł z braćmi a potym dopiyro z łojcym. Ale to się już miało swoji lata. Jak my byli bajtle to sie grało po budowach, na łąkach. Tak coby łojce nos niy chyciły. A teroz po chałpach, tam kaj wolno.

Czy w gronie graczy były kobiyty?

W szkata grały tyż baby. To tyż są dobre szkaciorki. Na chopa zaś godo sie szkaciorz.

Czy gro sie przy chalbie?

Alkohol przy szkacie to niy je dobro rzecz. To sie potym smoli. Przi kartach ni ma picio, bo sie matło. Jak łojce grali, to zawsze musioł być koniaczek.  A u nos zawsze są wafle, andruty kakaowe 51 dag. To je tako tradycjo. Jak przyłaża do dom to musza se coś do gymby inszego wrazić, bo mom tak słodko.

Ło co się gro?

Gro sie na drobne piniądze . Musi sie ło coś grać. Chocioż  ło gupi groszok. Ni może to być gra ło zapałki.

Ło czym sie godo przi szkacie?

Przi szkacie godo sie ino ło szkacie. Komentuje sie rozgrywka i jedym drugimu rod dogryzo: „Aleś zagroł, jak cajmer” abo „Z taką kartą, to by teściowa wygrała” Czasami w przerwie łopowiado sie dowcip. Nojlepszo gra je we sztyrech, jedyn łodpoczywo.

Jak często gro Pan w szkata?

Jo grom łod jesiyni do wiosny, co sobota. Norma to je łosiym godzin.

Dziękujymy gryfnie za wywiad i winszujymy ino fajnych kart.