Zdo sie, że ni ma takigo, kiery by za czasów młodości niy groł w gra, kiero zaczynała by sie jakomś wyliczankom. Wiela to było uciechy, kiej sie wyliczało „Wpadła bomba do pywnicy…” abo „Ene due, rike…” I skisz tego, że cołki czas sie ło tych latach myśli i chciało by sie do nich nozod przeniyść.

Spytali my sie kamratów ło jejich wyliczanki po ślonsku, ale napisano dzisio. I co jim z tego wyszło? Łoboczcie sami.

fot. SeeBeeW

Nojbarzij spasowała nom wyliczanka łod Marty:

„Antek kupioł se maszkyty,
i drap lecioł na zolyty,
dziołsze ich po trochu dowoł
i jom rod, tak se futrowoł.
Roz, dwa trzi i zaczynosz Ty!”
Marta

Były tyż inksze, kiere momy radzi:

„Roz, dwa, trzi i larmo
Ni ma życiu nic za darmo
chcesz mieć nogi jak oplerki
Grej we fusbal a ni w bierki”
Kasia

„Iki, piki
dwa szpyndliki
na zegrodzie gryfne dziki
za werksztelom dwa chlywiki
w króliczoku trzi starziki
…a na kogo padnie
to na tego bync”
Karola

„Wopno, cymynt, gips i woda;
gorol powiy: „ja ci podam!”.
Jo som biera kibel, kara,
bydzie chaupa, dowom wiara!”
Dominika

Wszyjstkim dziynkujymy za wyliczanki i zapraszomy zaś!

Pyrsk!