fot. Denis Collette

Psińco abo psinco to je po polsku tela, co nic.

Idzie pedzieć, że mosz psińco czyli, że nic ni mosz. Tak sie godo nojczyńścij, jak sie z kimś wadzi. Jedyn godo „Co żeś to padoł?”, a drugi mu łodpowiado „Psińco!”.

Abo jak se spotkajom dwie baby i se rozprowiajom i kieroś czegoś niy dosłyszy, toż pyto ”Ło co Ci sie rozchodzi?”, to ta drugo ji łodpowiado ”Ło Psińco”. Bo niy chciała drugi roz pedzieć, ło czym godała wcześnij.

Zdarzi sie tyż, że wtoś ło czymś tak łopowiado, tak sie asi. A tyn drugi wiy, że to taki psińco, że ty słowa nic niy znaczom.

Czasym tyż sie co kupi na sztandzie i sie w doma dziepiyro łokazuje, że to je psińco wort. Bo pora razy sie tego użyje i na hasi, bo już sie z tym nic niy zrobi.

”Psińco dostaniesz”, tak sie godało tyż, jak sie chciało jakigo bajtla postraszyć.

Abo jak na zolyty przyłaził synek do dziołchy. A niy podoboł sie łon jeji fatrowi, to fater potym cerze godoł „Dej se śnim spokój, bo łon tam psińco mo”.