fot. Shereen M

Gyszynk to je po polsku prezent.

Nojbarzyj z gyszynków radujom sie bajtle. Zawdy łone czekajom na Mikołoja, Dzieciontko, Hazoka i tyż na gyburstag.

Gyszynki przynosił Mikołoj, kiery wyglondoł jak biskup. Mioł łobleczony czyrwony ornat, na gowie mitra a w rynce trzimoł pastorał.

U niekierych Mikołoj niy pokazuje sie w doma bajtlom, ino dowo gyszynki na łokno. A robi to 5 grudnia we wieczór.

Bajtle ło tym wiedzom, toż pryndzyj dowajom talyrze na fynsterbret. A rano jak wstajom, to dajom sie do łotwiyranio.

Downij gyszynki robione były w doma przez łojców i starzików. Przeważnie były to heklowane i sztrykowane rzeczy. Bo abo sie dostowało rynkawiczki abo fuzekle.  Czasym trefiły sie tyż apluziny, jabłka, bombony abo co lepszego jak, ustrugany ptoszek, kiery klepoł szkrzidełkami, abo koń z furkom. Ale zdo sie, że to wiyncyj radości sprawiało bajtlom niźli teroz, jak dostajom jako modno graczka.

Jak przyszeł Mikołoj do bajtli, to niy łod razu dostowały ty gyszynki. Nojprzód musiały porzykać, a jak sie kiery pomylił, to Mikołoj go móg rózgom rzaznyć. Jak sie łokozało, że kiery sie niy słuchoł łojców i huncwocił, to dostowoł tytka z łoszkrabinami, wonglym abo hasim.