fot. Through Painted Eyes

fot. Auzigog

Bryle (abo niykierzy godajom tyż brele) to som po polsku okulary.

Chodzom w nich ci, kierzy niy widzom za dobrze. Ponoć piyrsze bryle, to były binokle. Trzimało sie je w rynkach i zaglondało choby przez lupa.

Nojczyńścij bryle noszom starziki. Łoni mieli taki, na kiere sie godało drucioki. Zakłodało sie je nojprzód na nos, a jich końcówka, tako federka zakłodało na uszy. I dziynki nij, bryle niy śleciały. Ciyżko tyż je było dostać. A jak sie już je miało, to nojczyńścij po kimś.

W doma zawdy były dwie pory bryli. Jedne do patrzynio na dalsze a drugi na bliższe. A jak było trzeja, to sie zakłodało jedne na drugi.

Na takigo, kiery łaził w brylach, godało sie brylok. Ale to je szpetne łokreślyni. Z takigo sie bajtle w szkole śmioły.

Łone czynsto sie tracom i niy roz wszyjscy jich potym muszom szukać.

Jedno, co sie w nich zmiynio, to to, że wyglondajom inakszyj, bo zmiynio sie moda. Downij były taki ciyżki bryle. Godało sie, że wyglondały choby dynko po mostrichu a terozki som taki leki, zrobione z plastiku. Downij była ino jedna forma a terozki idzie se sprawić jakisi kanciate, łokronglate i jeszcze inksze.

Dzisio mocka ludzi łazi w brylach a i som tyż tacy, kierzy ni majom wady a chodzom.