Jak sie tak czasym pruje na kole, mopliku abo autym, to niyroz przyłazi do gowy chyńć coby pobrusić wiynkszom maszinom. Ino, że to ni ma tak łeps! Trza mieć papióry wyrobione.

Ale niy trzeja papiórów, jak sie chce poszpilać na komputerze, pra? Dzisioj ło grze Euro Truck Simulator 2 wydanyj przez CD Projekt tyż w ślonskij wersji.

Tukyj kożdy może łostać kerowcom ciynżarówki i przejechać roztomaje autobany i myjsze drogi Europy. Tyż podziwać sie na nojwiyncyj łodwiydzane przez turystów miyjsca. I chocioż roz przewiyźć towor na kierego już czekajom gyszefciorze.

Jak sie gibko wszyjstko dowiezie kaj potrzeja, to idzie se trocha naszporować i potym sprawić jako ekstra maszina, jak Scania, Renault abo MAN. Ale nojważniyjsze, wszyjstko je napisane po naszymu. A tłumaczyni narychtowoł Grzegorz Kulik (http://poslunsku.eu/).

A jak by chcioł se poszpilać, to tukyj je ło nij wiyncyj: https://cdp.pl/gry/euro-truck-simulator-2

Konkurs!!!

Je łokazja, coby 3 taki gry wygrać. Coby to zrobić, napiszcie do nos na [email protected] nojgryfniyjsze słowa, kiere sie tyczom auta (i łopiszcie czymu łone).

Mocie czas do środy do 20:00. Tym trzem, kierzy przyślom nojfajniyjsze łopisy, wyślymy gry, kiere my dostali łod CD Projekt. A nojgryfniyjsze słowa pokożymy na gryfnie.com.

Toż winszujymy powodzynio i czekomy. Pyrsk!