fot. e_walk

Latoś z 23 na 24 czyrwca je Noc Świyntojańsko. Łoj dzioły sie wdycki na Ślonsku rzeczy.

Lotani do goja, coby znojść kwiot paproci, polyni łogniska, ciepani wionków na woda, myśla, że to trzeja dalij robić. Toż co jak i kaj, zaro Wom łokludzymy.

Z soboty na niedziela momy nojkrótszo noc w roku. Je to czas inkszy i idzie wdycki pora rzeczy se sprawić.

Fojera

Po piyrsze, jak sie zrobi cimok trzeja zrobić fojera, tako fest do wiyrchu. Tym nojlepij jak sie zajmnom chopy. Godom chopy, bo łoni bydom przez ta fojera skokać. Wiadomo tak coby se czego niy popolić. A czymu skokani przez łogiyń? Bo nasi przodkowie mieli wiara, że łogiyń mo moc łoczyszczajonco i to co złe może z ciebie wyciepnyć. Tyż to je dobre dlo zdrowio i siły do roztomajtych rzeczy. Terozki tyż nojlepij wzoś ze sobom kusek wusztu i przy łokazji se pomaszkecić.

Wionki

Teroz coś do babów a raczyj młodych szwarnych dziołchów, kierym przydołby sie karlus.
Trzeja se sprawić dwa wionki ze kwiotków i ziół. I znojść kusek stowka i puścić te wionki na ta woda. A jeszcze pryndzyj wrazić do pojszodka zapalono świyczka. Dejcie pozór teroz! Jak te dwa wionki sie ze sobom zyndom, to bydzie na bezrok weseli. Coby było tyż weseli trzeja łod zadku wionek ciepnyć na goj. Jak sie łobiesi, to bydzie to na co sie czeko cołki życi.

Kwiot paproci

Trzecio rzecz, trza wzoś karlusa i iść śnim do goja. Nojlepij po cimoku, bo ino wdycki idzie znojść kwiot paproci. A jak kwiotek wyglondo, tego Wom niy powiym, bo żech jeszcze niy znodła, ale zawdy do lasa z mojim łaża.

Ponoć jak sie go znojdzie, to bydzie sie szczynśliwym. Toż nic ino trzeja próbować, pra?