Linh Nguyen

Downij sie godało, że wto mo „wela na niedziela”. Abo, że wto trzimie w szranku „niedzielny ancug” abo „mantel do kościoła”.

Niedziela była dniym, kery różniył sie łod innych dni w tydniu. Nie robiyło sie wtynczas w polu, we sobota sie pucowało cołko chałupa, coby był porzondek, a i łobiod był lepszy niż bez tydziyń.

W niedziela sie kożdy wysztiglowoł jak koń na dożynki i cis do kościoła, a potym kaj do łojców czy somsiodów na kawa. Wtedy sie świyntowało jak Ponboczek przikozoł.

Terozki to roztomańcie z tom niedzielom bywo. Nikierzy muszom w niedziela robić, nikierzy cisnom do kaufhauzów abo sprzontajom, bo kiedy indzij ni ma na kiedy. Taki momy czasy.

Jo by wos jednak chciała namówić, żebyście świyntowali niedziela i nie yno niedziela. Bo wto padoł, że nie idzie świyntować wtorku, środy abo soboty? Nie trza zaro ciś do remizy na potańcówka z łokazji poniedziałku. Chodzi mi raczyj o robiyni kożdego dnia małych rzeczy, kere sprawiajom nom radość.

Siednij se po robocie z babom, wypijcie se jakigo dobrego tyju z piyknej szolki. Pogrej z bajtlami, weź ich na szpacyr i połoglondejcie, co sie w przirodzie dzieje. Pobow sie z psym, poszkrobej kota po puklu. Poczytej se ksiożka, łobejrzyj jaki dobry film. Zjydz se coś, co lubisz i na talyrzach „do gości”.  Znejdź 15 minut dziynnie yno do siebie, coby se dychnyć. Zrób kożdego dnia coś, żeby tyn dziyń był lepszy.