fot. Laura D’Alessandro

Momy dwadziesty piyrszy wiek. Som my szkolyni, poradzymy pisać i czytać ze zrozumiyniym.

Nie dowomy wiary, jak nom kery „ciśnie jakiś kity”, abo „godo z gorki”. Toż jak my som tacy kumaci to rzeknicie mi, skond sie biere wiara w zabobony? Przeca  kożdy, co ształnuje i do tego ształnowanio używo rozumu, wiy, że to je gupi i tela. Yno, że kożdy robi roztomańte łone coby minyć pecha, a z drugi strony, żeby trocha szczynściu pomoc.

Czorny kot

Taki nojbardzi znany przikład to je czorny kocik, kery Wom przelezie bez droga. No i co wtedy? Ni ma nom ciynżko nadciepnyć drogi coby yno niy przetnyć łod niego ściyżki. Ale jak mocie czornego kocika w doma za swe to już to ni ma pechowe. Gupi to je pra?

Pociorki na chyrtoniu

Dziołcha, kiero niy chodzi sama niy łoblecze se pociorków na chyrtoń, a co dopiyro nie bydzie łazić pod sznurami z pranio. Wszysko po to, coby bajtel, jak sie już bydzie rodzić, nie był łowinyty pympowinom.

Tasza zawdy na stole

Praje kożdo baba niy ruszy se z chałupy bez taszki. W nij je wszysko zocne, pieronym ważne i bez tych graczkow se niy ruszy. I tyż praje żodno baba, jak przidzie na klachy, niy postawi taszki na zola. Czamu? Bo piniondze jij „ucieczom” z portomla, w kerym z resztom trzmie łuska z kapra (co mo jij przisporzić cołki czas przipływ piniondzorów). Możno tyż bydom taki baby, co wylazły z chałupy bez taszki. Taki były zalotane, że sie kapły na szosyji, że jom ni majom. Trza sie wrocić. I tyż tak robiom (baba bez taszki niy pojdzie ani po gymiza do zielynioka). Jak już wlezie nazod do dom i taszka weźnie, to choby sie ij „polyło pod szłapami”, musi siednyć i porachować: roz.. dwa.. trzi. Dopiyro jak to załatwi może stanyć i wylyź. Jak tego niy zrobi pech bydzie za niom cołki dziyń łaziył.

Knefel trza trzimać

Kery z Wos niy trzimoł sie za knefel jak uwidzioł kominiorza i to tak długo aż uwidzioł baba w brylach? Pryndzy niy idzie se tego knefla puścić, bo bydzie nieszczynści. (jo je ciekawo co bydzie, jak kedyś wszyscy bydom deptać w soczewkach. To tyn knefel bydymy trzimać aż do truły!)

Na grubie sie niy gwizdo

Kożdy hajer Wom powiy, że na dole gruby se niy gwiżdże. I to je recht, jedni godajom, że to z szacunku do tych co tam życi łostawiyli. Jedni zaś godajom- gwizdani je zakozane bo se wongli wtedy traci i nie bydzie co fedrować. Łojciec, kery na grubie robi godo, że teraz to chyba we Warszawie pogwizdujom, bo wonglo sam u nos momy w pierony, yno żodyn go jakoś  nie chce.

Pewnikiym sami znocie jeszcze wiela takich zabobonów i tyż licza na to, że napiszecie ło nich pod spodkiym.