fot. Radosław Kaźmierczak

Szlojder downij to była nojbardzi ważno graczka łod bajtla. Terozki już tak ni ma. Dziecka majom pełne szranki roztomańtych łonych. Kiejby jednak praje kery z Wos kcioł se  som zrobić, abo młodszymu bracikowi uciecha, to zaroz powiym jako se za to zabrać.

Najsamprzód trza poszukać tako rozkraka. To je nic inkszego jak buńtki, kere sie ukłodajom w litera Y. Znejdziecie to w lesie abo w zegrodzie. Łojciec mi padoł, że nojlepszy jak to bydzie z olszyny, bo tyn stromik przez to, że je giyntki na zicher sie na to nadowo.

Jak już mocie utnyty taki konsek drzewa, to se go obiercie z kory, coby Wom to w pazurach potym niy kiełzało. Kożdo ze stron tyj rozkraki dobrze by było, kiejby miała ze szpana długości. Wiyncy niy trza.

Jak już to mocie narychtowane, to trza znejś dwa poski gumina. Nadowo sie na to ciynko dyntka z koła. Trza urznyć taki, coby mioł ze cyntymeter na wrzyszka. Z delka jaki 30 cyntów. Ty poski z jednyj strony łonaczymy we wiyrchni łodnogi Y.

Szkoły mocowanio som roztomańte. Jedni normalnie wionzajom na wanzeł, inni łokryncajom to momyntkom. Sami uznocie co Wom bardzi gro.

Drugi końce guminów wionżymy do łatki ze skóry. Nojlepi jak to je łata ze jynzyka starego szkarboła. Z boku łaty robi se dziury i guminy idzie łonaczyć.

Szlojder gotowy. Trza terozki poszukać se jaki kamyk, dać go do łaty, naszpanować i mogymy strzylać.

Yno ludzie, pamiyntejcie niy cylujcie do fynstra, cilipa abo pulta! Nojlepszy cylujcie do biksy po piwie abo jaki kokakole. Jak treficie, uciecha gwarantowano!