Kafej w Katowicach
Terozki wszyndy łotwiyrajom sie roztomańte gyszefty, szynki i restauracyje, kere majom ślonski nazwy. Łobmyślilimy, że bydymy ło nich pisać. Na piyrszy łogiyń idzie Kafej, kery łotworzył sie łońskigo roku we wrześniu na Chorzowskij 5 w Katowicach. Postanowiyli mi sie tam wybrać i łobejrzeć, co tam ślonskigo i dobrego majom.
Co to je i co tam idzie robić?
Idzie se tu prziś co zmaszkecić i napić sie dobrego kafyju. Łodewrzone je już od 7 rano, toż i na śniodani idzie sie tu wybrać, jak sie w chałupie nie chce nic rychtować. Do środka mogesz wlyź z psym abo kotym, a na dworze zawdy tyż stoi miska z wodom, jakby sie twój mały kamrat na sztyrech szłapach zafuczoł po drodze. Terozki, jak je ciepło, to je tyż rozstawiony łogródek, kaj som dwie srogi palmy, drzewiane kisty po jabcach, na kierych se idzie zicnyć i sznury z byrnami, kiere świycom na wieczór, coby niy siedzieć po cimoku.
Jak lubisz se co kłpanyć na słono, abo na słodko, mogesz tam drałować. W Kafeju kupisz i porzondno sznita i lynga z bratruły i jako zista. Do picio je kafyj na mocka sposobów, tyj, zelter, a nawet gorko szekulada. Som tyż świyżo wyciskane soki, na pirzkład z apluzyny.
W pojszczodku je fest szumnie. Placu je moc, bo łoprócz parteru idzie też pociś po schodach na wiyrch i se siednyć na takij choćby górce. Z radia lecom pieśniczki, ale taki zocne, beztóż sie fajnie siedzi.
Kaj to je?
To je w Katowicach przi Chorzowskij 5. Idzie tam ciś piechty abo jechać banom. Styknie wlyź do 0,6 abo 19 i wysiednyć na przistanku Katowice Sokolska. Bez tydziyń łodewrzone miyndzy 7:00-21:00 (w piontki do 22:00), we soboty miyndzy 10:00-22:00, a w niedziele miyndzy 10:00-21:00.
Co byś na to pedzioł?