fot. jackyczj

Idzie podzim, i nikomu chyba tego niy trza godać, bo jak już trza mantel wyciongać ze szranku i całe szczewiki glancować, to niy ma ło czym wiela godać. Bez podzim czasym je klara, ale czasym tyż leci dyszcz. Niy ino bajtlom sie mierznie jak kido z nieba, starym tyż. Co wtynczas robić jak tako szpetno pogoda? Dziś spomnymy Wom jakie graczki mieli piyrwy i jakie my momy durch. Piyrwsze bydom chopy, a ło babach bydzie dalij.

Szkat 

W szkata chopy grali i grajom durch. Niyrozki jak czowiek siednie do autobusu to łod Piekor do Tarnowskich Gór łoni umiom ło tym łosprawiać! Idzie sie chnet nauczyć łod samego suchanio. Szkat to niy je tako prosto gra, a i łostuda przi tymu je, kej sie jedyn z drugim wadzi, że to łon mioł trumfa! Baby terozki tyż grajom w szkata, ale piyrwy byli ino szkaciorze.

Chytanie flyjów 

Pewno miarkujecie po jakiymu to mo być niby graczka – chytać chroboki? A no po takiymu, że flyjami sie futrowało ryby. Terozki wszysko idzie kupić w gyszefcie, ale piyrwy (chocioż wcale niy tak downo) przod cza było bichnońć mamulce rajtuzy abo pończocha, a potym sie szło na stow chytać flyje. Szpasu było w pierony, a i coś sie przi tymu znodło inkszego – a to rapitołza, a to jakigoś fołgla, abo sorna pitła sprzed nosa. No i potym ryby w akwarium tyż miały uciecha z tymi masnymi flyjami!

Łażynie po barzołach

Zaś jakieś wymyślate graczki? Niy, blank proste – jak sie łazi po barzołach abo po lesie to idzie znolyź grziby! Chopy coby mogli na chwila pitnońć łod babow to szli nazbiyrać nec grzibow. Na wieczor potym zawsze maszkyci sie szmory – smażonka z tymi grzibami. Niykerzi łażom po barzołach z luftbiksom i chytajom gadzina, chocioż czyńści upolujom jakigoś klyszcza niż fazana!

Pulty
Wiadomo tyż, że chopy majom w zocy roztomajte szporty, i ptoka na punkcie ptoków – gołymbi i handzlikow. A cza by im czasym dostać ptoka na punkcie śmiatka i hadry, bo jak nagaruszom kole siebie to gowa mało!

No a co robiom baby kej niy siedzom w robocie i co robiły piyrwy? 


Szkubki

Terozki momy deki i sztepdeki ze roztomajtych ledy jakich dinksów, ale tako richtig pierzina z piyrzo, to je nojlepsze pod czym idzie leżeć! Coby spać pod takom pierzinom i na takim zygowku musiały być nojprzód szkubki. Terozki wszysko robiom maszyny, ale piyrwy kupa babow zbiyrała sie rajn w jednym miyjscu, nojczyńści jak już było zima i cima, i szkubała. To był fajer prawie jak świniobici, bo była okazja do klachow, do pokozanio wto se zrobił dałerwele, a komu sie niy chciało, do kery już łazi szac, a kero durch niy mo nikogo na łoku. Piyrzo cza było naszkubać w pierony, bo tako pierzina to umiała ważyć nawet do dwanostu fontów!

Sztrykowanie, heklowanie, ficowanie

Terozki zaś nazot sztrykowanie jest w zocy. Niy ino stare baby siedzom ze heknadlom abo jegliczkami i łonaczom warci niż maszyna. Piyrwy miało sie wzory ze cajtongów, nojczyńści z Rajchu i rychtowało sie cwitry, zoki na gyszynk, szale i mycki. Terozki sztrykuje sie łoblycza, ale na mobilniok, abo tablet. Ficuje już mało wto, bo terozki idzie kupić se nowe zoki jak sie przedziurawiom, i mało wto wiy, co do niego godajom, jak mu padajom „tyś je chudy jak cwist”. A Wy wiycie?

Zaprawianie 

To tyż sie durch robi. Nojczyńści jak woś mo swój plac abo zegrodka i mo tam posadzony roztomajty grincojg, to na podzim biere krauzki, kere zbiyroł cołki rok i zaprawio. Roboty jest w czi a nazot, bo cza umyć, łoszkrobać, wyzuć poczaskane a łostawić zdrzałe owoce abo warzywa, zawarzyć woda, miyszać dugo, kidnońć to potym do wekow i zadymfować. Baby zawsze przi tym wajajom, ale jak potym to cołko familia chwoli i jy aż im sie uchole trzynsom to sie cieszom, że takie maszkety narychtowały.

Jest jeszcze mocka inkszych graczek kere robiom baby jak majom trocha wolnego, ale kej by my je mieli wszyskie sam spomnieć to by czasu niy stykło. A tak po prowdzie to wiymy, że i tak nojwiyncy czasu baby siedzom przi zdrzadle!