fot. KX Studio

Godajom, że idzie poznać po człowieku skond je, po tym co jy, abo po oblyczce i zachowaniu. Rozchodzi mi sie o auslyndrów. Przygotowałach pora takich zagadek, na pewno sie gibko kapniecie ło kogo sie chechle.

1. Depce we berecie, spod kierego widać yno kichol i podkryncony, dugi fons. W rynce mo abo dekel ze farbami, coby namalować jako sago baba, abo harmoszka, kierom przygrywo inkszym jak szamajom ślimoki, żaby i lingi.

2. Mo złote łoprawki we brylach i cylownik na przednij klapie ze auta. Nojczynścij je wysztryngowany, pieronym lubi piwo, a jak godo to takiym tonem, jakby cie chcioł łopieprzyć. Podobno mo wszysko poukłdane i nojbardzij lubi słowo „ordnung”.

3. Ta nacjo mo pierońsko ruła i choćby sie walyło, polyło to o piontyj po połedniu musi se napić tyju. Bez tego tyju dziyn mo zepsuty. Na cało reszta auslyndrów zaglondajom trocha z wiyrchu, a jak kiery nie godo po ichniymu toś je drugi zort.

4. Majom moc wielki rodziny, dziecek pełno, a we doma cołki czos butel. Kery ich nie zno, myśli, że sie cołki czas wadzom. Nudle by umieli jeś kożdy dziyń i zagryzać pizzom. Żodnyj babie niy przepuszczom- nojchyntnij z kożdom napotkanom frelom by sie zaroz żynili.

5. A łoni to umiom wypić tej gorzoły! A nojbardzij wymyślno do nij zagrych to je konsek szpeku abo łogorka. Baby deptajom we futrach i łobwieszone som złotym jak świontyczno choinka.

6. Te nasze sonsiady fest wicujom, a po jednym piwie umiom śpiywać i sie bawić cołki wieczor. Taki śmiyszki! Bo tyż według nos cało łod nich godka je śmiyszno. Na cołkim świycie na Austyjoków godo sie Austryjoki, yno po ichniemu godo sie Rakołszanie. Śmiyszne, pra?

7. No a kery to je? Narzyko na wszyskich dookoła: na robota, sonsiadow, rzond, farorzy. Zarobi dwa tysionce, wydo na miesionc trzi, a jeszcze dwiesta wrazi do fuzekle. To je sztuka, ni? To yno łoni umiom. Ale se w kożdyj sytuacji poradzom, mimo że niy zawsze majom leko.

No dyć to som yno stereotypy, kere nom powlazowały do łbow przez lata. Te wszyski cechy może mieć każdo nacyjo, kiero sam je łopisano. Choć troszka prowdy w tych zagadkach je.