Latoś 30 czyrwca łodbydzie sie Industriada. To je Świynto Szlaku Zabytków Techniki.  Bydzie kupa larma i uciechy we 22 miastach naszego województwa.

fot. Radosław Kaźmierczak

Prawiymy Wom żodnymu niy bydzie sie tukyj mierzło. Bajtle łoboczom jak działajom roztomajte masziny a i bydom sie mogły niykierymi karnyć. A starsi pofajrować  na roztomajtych koncertach, kierych latosi bydzie trocha. Bydzie szło łodwiydzić ty cuda techniki a je ich na Ślonsku mocka, toż łopisujymy piyrszy śnich – Elektrociepłownia Szombierki.

Ponoć coby jom postawić trzeja było wzoś tela cegłówek, co poszło na zomek we Malborku. Jak padocie wiela lot jom stawiano?

Po coż zygor? Baby z Bytomia warziły jajca wele czasu na cyferblacie zygora na wieży Elektrociepłowni Szombierki. Jajca wyłaziły taki richtik!

Jak padajom bery i bojki nojprzód miała tukyj być fabryka szpryngsztofu. To wszyjsko grało skisz srogich konstrukcji, ale stało sie inakszyj. Niykierzy padajom, że je to miyjsce kaj je nojwiyncyj kultury we kraju i majom recht.

fot. Radosław Kaźmierczak

Niykierzy tyż prawiom, że Elektrociepłownia Szombierki, to nojszykowniyjszy obiekt na Szlaku Zabytków. Tukyj dziejom sie cuda, kaj sacrum styko sie z profanum.
Łogromne mury, srogi łokna i wysoki powoły – niy to niy kościół.

Ale szło by pedzieć ło nij świontynia techniki. Projekt Elektrociepłowni mioł sie starać ło sakralizacja przemysłu.
Baumanami EC Szombierki byli Emil i Georg Zillmannowie (bracio stryjeczni). Łoni tyż zaprojektowali łosiedla górniczo-robotnicze na Giszowcu i Nikiszu.

Hala maszynowni z brzymowym powołym. Skisz emporów, kiere som nałokoło, kojarzy sie z salom balowom zomków. Bydzie szło łoboczyć to miyjsce ino nojprzód trza bydzie sie przeblyc, ale niy we szaty balowe, ale we kaski na gowach i westy łodblaskowe.

Wiyncyj ło Industriadzie znojdziecie tukyj:

http://www.zabytkitechniki.pl/
http://www.facebook.com/SzlakZabytkowTechniki
http://www.industriada.pl/

Tukyj bydymy zaś wciepywać łopisy zabytków:

http://gryfnie.com/wydarzenia/

Zapraszomy 30 czyrwca!