fot.Pixabay

Moja ty roztomiło, Jo Ci tak fest przaja, że bych cie kompoł a ta woda piył. Mój ty dzióbeczku złoty, pódź sam ku mie. Wiela razy sie słyszy jak tak se młodzi piyknie godajom i maszkecom ku tymu. I ło to sie rozchodzi, trzeja se przoć wiela wlecie, bo życi je jedno. Tych słów, kere sie tyczom przonio je moc. Skisz tego zrychtowalimy konkurs w kierym godomy ło tym naszym ślonskim przoniu. 

Zolyty

Fto z nos niy zolyciył? Na zolyty synek przychodziył sie zawsze z fanjym gyszynkym. Ale dziouszkom sie nojlepi podoboł kwiotek, kiery synek urwoł som – czasym z trownika a czasym z łgrodu abo z kwiaciarnie. A nojlepi smakowały dziubki dowane po kryjomu jak sie szło po ćmoku na szpacyr. A jak sie juz usłyszało „przaja ci” to hercklekoty były take, co az deklym ruszało. Piyknie było

/Teresa z Piekor Ślonskich/

Libsta, kawa, zista i bajtel

Bo na Ślonsku drogie Panie
Pszajać sie to jest kochanie
Szmaterloki w brzuchu mocie
Jak nawzajym sie pszajocie
A na Wasze całowanie
To sie godo zaś kusianie
Chop do dziołchy godo libsta
Na zolytach mo kawa i zista
Bo zolyty to spotkania
Łod wieczora aż do rana
Owoc tego wszystkim znany
To mały bajtel je kochany
Dziołchów na tym świecie wiele
NojGRYFNIEjsze ślonski frele.

/Marcin z Rybnika/

Kuszlować abo mamlać

U mje w chałpie zowdy godało sie „kuszlować” i „mamlać” (w znaczeniu dować sie kusiki), kere to słowa mom dzisiej fest rod.No i tak sie myśla, eli je cosik gryfniejszego łod kuszlowania sie ze libstom… To jes taki moment, w kerym synek i dziołcha rozumiejom sie bez słów, niy zaglondajom na zygor yno genisujom sie chwilom. Wtoś pedzioł, że kuszlowanie to jes takie ciche „jo Ci przaja!”. A jak som my jeszcze bajtle i zolyty nom nie w gowach, to kuszlujemy sie z mamulkom. No i słowo „mamlać się”… Czynsto słysza łod starych ludzi, co jadąc autobusem i widząc jak jakoś frelka durch yno dowo kusiki swojemu szacowi, godajom: „Kuknij sie Trudka – łoni sie yno mamlajom. Ta dziołcha mu ani dychać niy do.” Ale tak richtig, to ta oma jes zowistno, bo tyż by tak chciała.

/Oskar z Tarnowskich Gór/

Fet do boncloka

Nie starczy godać, że sie komu przaje. Fanzolić i łonaczyć kożdy umie. Trza być do kupy przez dugie lota: łod frelki i karlusa po starka i starzyka. To przajanie musi sie roztapierzać na cołki życie, na kożdy dzyń i ćmok. To przajanie nie może dać sie poszelontać łod nikogo. Toć, Łona i Łon muszą być jak yjza i przwierać do sie jak fet do boncloka. No to pyrsk ludkowie, przejcie sie blank mocno i kożdy dzyń halajcie?

/Irena z Bierutowa/

Hercklekoty i amlot

Słowa kere kojarzom się z przoniem to napewno som ZOLYTY czyli tako randka libsty z szacym (narzyczonej z narzeczonym)
Dać DZIUBKA, albo KUSIOLA czyli się pocałować. Mieć HERCKLEKOTY czyli mocne bicie serce jak się w kimś zakocho.
MASZKETY czyli słodycze dla ukochanego no i BLUMY czyli kwiatki kiedy chop daje je swojej frelce.
CICIAĆ SIĘ czyli mówić czułe słówka „jak jo ci przaja”, „ale z ciebie fajno frelka”. No i AMLOT to pierścionek kiedy szac się oświadczo libście.

/Klaudia z Mikołowa/

Kusik

Niy wiym czy znojdzie sie tukej chocioż jedyn taki, kiery nie lubi dować i dostować mocki kusikow. To je chyba nojgryfniejsze (zarozki po słowie galoty) słowo ślonskie. Jo jak prziłaża do dom po nocnyj szychcie, a lygna se kole mojij ślubnyj we zagrzonym pryku, to taki kusik smakuje lepij niż oplerki na śniodani:) bo tak ij przaja :)

/Daniel z Gostyni/

Nelki, Farbiczki, Mlycze

Tulpy, Rouze, Nelki… to sum kwiotka co dziołchy fest kochajum. Atoli jak szac natargo na polu Farbiczków, Gynsi pympków, Mlyczów i wyłunaczy gryfny bukiet z tego, to dopiyro libsta mo fest hercklekoty i takiymu chopowi bydzie kusikowała i przajała przez cołki czos… Pra?;)

/Marek z Zawadzkiym/

Jo Ci przaja

-Idziesz na plac?
-Ja.
-To łoblyc mycka, a pozapinej sie fest pod kark
-Czamu mamo, inksi niy łoblykajom…im niy kożom….
-Ale jo Ci przaja……

/Aniela z Swiyntochłowic/