Ślonski savoir-vivre - Kultura - gryfnie

Ślonski savoir-vivre

fot. Dominika Kochanecka

Na zicher słyszeliście już mocka roztomajtych berow i bojkow ło Ślonsku i Ślonzokach. W kożdy bojce jest ponoć trocha prowdy, ale miarkowali my se, czy wiycie aby, co śmicie robić, a czego niy, jak już przijedziecie na byzuch do takigo richtig hanysa. Wiycie? Jak niy, to trefiliście tam, kaj trza, to je do nos, a że momy terozki gynał tyn czas, że sie rajzuje bele kaj, to możno mocie we planach przijechać na Ślonsk. Tego wom żodyn rechtor niy powiy co my, beztoż czytejcie i spamiyntejcie. Na jednym zdaniu pokożymy wom, jak na zicher niy zrobić se gańby na gościnie we tym naszym landzie.

Weź se to po leku!

Terozki dejcie pozór!. Jak przidziecie do hanysa, to może być tak, że łon wom powiy tako: „Sebuj sam te charboły na tym tricie, bo mi namarasisz, a jo żech niydowno tepich klupoł, a do  klopsztangi musza tyrać aż trzi ajnfarty dali! Nojprzod sie sebuj, a potym poć pomaszkecić.” Tak po prowdzie, to weźcie se to po leku. Niy myście se zarozki, że łon wom ubliżo, abo fulo choby gupielok. Udowejcie, że wszysko rozumicie, a jak niy spokopicie nic, to padejcie „ja, mhm” i wszysko pódzie z górki. Niy myście tyż, że łon wom wiyszo nudle na uszy, abo je frechowny bo wom koże włazić po bosoku. Niy, łon ino je szczyry. To spamiyntejcie – hanys wom powiy wszysko prosto z mostu, niy bydzie cyganił. Beztoż niy ciepcie fochym, jak to godajom dzisioj mode ludzie, niy nerwujcie sie zarozki, ino kiwejcie gowom, że ja, zgodzocie sie.

Niy fulej!

Ale tyż niy śmicie hanysowi godać gupot, bo jak bydziecie fulać jak potuczyni, to hanys sie umi znerwować. Bezto niy godejcie mu, żeście sie łoblykli biołe zoki i niy wleziecie bez szczewikow, boście słyszeli, że u nos to ino maras i kurz! Możno i momy zamiast gór hołdy, a nad nami wisi durch naszo ślonsko mgła, ale w doma to Ślonzok mo glanc, a co dopiyro na fajer! Jak somżeście starsi niż wasz gospodorz, to może wom pedzieć zamiast „sebuj” to „sebujcie sie”, choby wos było dwóch. Niy rwijcie se wosow z gowy kombinujonc, czy łon już łobalił halbka i widzi podwójnie – na Ślonsku sie do starszych godo „za dwoje” i tak tyż wy do łonych godejcie!

Maszkeć co dowajom!

No i łostatnie, nojważniyjsze – kejżeście som na byzuchu u hanysa to jydzcie. Jak już ściepniecie ty charboły to sie siednijcie i pomaszkećcie. Egal czy wom dowajom szałot, czy leberwuszt – jydzcie! Bo jak sie wto dowiy, żeście u hanysa niy pojedli, to mu zrobicie gańba jak som pieron, a wos bydom mieli za rozbestwionych auslyndrow!

I tak na wartko, bo możno już jednom szwajom somżeście na byzuchu – cobyście lepi spamiyntali – udowejcie, że wiycie ło co idzie jak godajom blank po ślonsku, niy łobrażejcie sie jak panocki ło bele co, niy fandzolcie gupot, starzikom godejcie za dwoje i jydzcie! No, to terozki życzymy wom gryfnego fajrowanio!

  • 08.08.2015

Co byś na to pedzioł?

Gryfnie pyto #13 – Prima Aprilis

Gryfnie pyto #13 – Prima Aprilis

Spytalimy sie chopów i babów, kierych my trefili na Nikiszowcu, ło to jakie wice rychtowali na Prima Aprilis! I ło Wielkanoc tyż! Zoboczcie co nom pedzieli!

UCIECHY NA ŚWIYNTA

UCIECHY NA ŚWIYNTA

Kożdego roku zawdy prziłazi taki czas, kiery raduje kożego z nos. Piykne, grudniowe wieczory. Miasta łoblyczone w tysionce światełek, goiki przistrojone glaskulami. A to wszyjstko skuli tyj gryfnej okazji, kiero niyjednego rozgrzywo łod środka. Nadchodzom świynta, chned zajś bydzie wilijo.