fot. Ziemowit Cabanek

Już trocha po Polsce porajzowałach, niy było mie chyba yno w Biołymstoku. Łostatnio żech se rozważowała, jaki je nojlepszy miyjsce do miyszkanio w Polsce. I żech tak ształnowała i wyształnowałach. Musza pedzieć, że mom już typ. Nojlepij miyszko sie… na Ślonsku! Zatkało?

Blisko na knedliczki

Niy mignie ani chwilka, a już my som za granicom! Jak mosz szmak na czeski piwo abo knedliki, to niy musisz se ich łoglondać we internecie, yno wsiadosz do auta (a nikierzy to majom tak blisko, że mogom na kole, abo i z lacza) i do poł godziny żeś je u Pepików! Z nimi złonaczony je jesze jedyn plus – niy ma problemu, żeby sie dogodać. Dyć we ślonskim momy wiela czeskich słów.

Familjo

Niy znom miyjsca w Polsce, żeby sie godzinami po kościele siedziało z familijom przi kawie. I sie tak pół niedzieli siedzi i dżiszcze. O bele czym! Wcale niy muszom to być jaki wielki tymaty, po prostu sie ze sobom je i sie raduje, że my som razym. A ku kawie jeszcze oma zrobi roztomańte zisty i tak mogymy siedzieć i do wieczora.

Tońszy wongiel

Kamratka mi godała, że u niych jak widzom wongli to sie na niego ciepiom jak gupi, a do tego je on pierońsko drogi. Wiela razy żech słyszała: „Ja, we Rydułtowach to mocie nojlepszy wongiel i je tońszy niż kaj indzi!” A jeszcze jak żeś fedrowoł na grubie, to mosz deputat i nie musisz sie starać, że zimom bydziesz sie telepać.

Wszyndzi blisko

Jak u nos jedziesz autym, to niy wiysz kiedy sie jaki miasto kończy, a kiedy zaczyno. Kiejby przi drodze niy było tabulek, to byś ani niy wiedzioł, że skończył sie Chorzów, a zaczło sie Zobrze. Jak na Polska to je ewenymynt! Je to o tela wygodne, że jak czegoś ni ma w jednym mieście, to znejdziesz to w drugim, trzecim, abo piontym. Na jednym bilecie mogesz rajzować po cołkij aglomeracji i niy musisz być wylynkany, że ci blajtka przepadła.

To je yno pora przikładów, czamu na Ślonsku sie lepszy miyszko! A tera mie przegodejcie, że u Wos je lepszy!