fot. Ilya

Wszyjscy ino godajom tak, wszyndy dobrze ale w doma nojlepij. A kaj to je nojlepij? Jedyn woli miyszkać w mieście, inkszy zaś na wsi. No toż kaj? Jo niy wia, ale wia, że wszyjstko mo swoji plusy i minusy.  

Po toniu
Jak pódziecie do gyszeftu i weźmiecie ze sobom 50 złotków, to wiyncyj za nich kupicie se na wsi. W mieście je wszyjstko drogsze. A im wiynksze miasto, tym je  drożyj. No jo niy godom tukyj ło sieciówkach. Bo tam wachujom, coby było tak samo.

Choby w raju
Na wsi możesz se po nagu wyskoczyć i Ci żodyn nic niy powiy, bo tyż żodnego ni ma kole ciebie. A w mieście jakbyś tak zrobił, to Cie za warjota łod razu weznom. Na wsi wyleziesz se ino na plac i mosz cisza i spokój. I niy musisz daleko jechać, coby dychnyć, bo cołko natura mosz na pozdoryndziu.

Smolom Cie
Jak chcesz coby Cie żodyn niy znoł, to lepij Ci bydzie sie przekludzić do miasta. Tukyj Ci sie żodyn niy bydzie wstyrkoł, do tego co robisz. A wiyncyj, nawet Ci niy bydzie godoł dziyń dobry, jak go spotkosz po roz kieryś na schodach.
We wsi kożdy kożdego zno, wiy wszyjstko ło ciebie – wiyncyj niyroz niż ty som ło siebie wiysz. Dejmy na to możesz sie dowiedzić, żeś zolycił z somsiodym. Kaj tam, do tego mosz z nim bajtla. Chocioż to ni ma prowda.

Fajer ino w mieście
Jak se chcesz iś na jaki fajer, abo do tyjatru, abo jaki fajne łachy kupić, to ino w mieście. Czasym je tego tela, że niy wiy czowiek, kaj mo iść.  A do tego jeszcze wszyndy je blisko. Bo ino sie wylezie za winkel a już sie mo. A jak kierymu niy pasuje jaki gyszeft, to zawdy se może wlyźć do banki, abo cuga i już je, tam kaj chce. A we wsi musi niyroz lecieć pora kilometrów, coby dostać ino chlyb.

Wszyndy smrodzom
Niykierzy godajom, że luft na wsi je lepszy. Możno i majom recht. Ale jak tak czasym wto zapoli jakimś dziadostwym to już lepszo woń je w mieście, godom Wom.

I na fajrant
Som tacy coby chcieli być tacy miastowi i tam durś cisnom. Tam miyszkajom i żyjom. I na wieś by niy poszli, bo wolom woniać smrody z autów, niż swojsko woń naturalnego nawozu. Ci ze wsi cisnom, do miasta a ci z miasta na wieś. I tak to już je. Nojlepij sami wybiercie, kaj Wom je nojlepij. Bo ni ma nic gorszego, jak miyszkać tam kaj sie czowiek źle czuje.