Hurdu hurdu w warszawskim radioku

fot. Piotr Sobczak
fot. Piotr Sobczak

Latoś ludzie ze Ślonska z Żor, Adam Oleś i Dominika Kontny pospołu ze swojom kapelom, jako jedni z niywielu z naszego regionu bez ty 15 lot istniynia konkursu, zagrali i zaśpiywali swoji konski na Festiwalu Nowa Tradycja w Polskim Radioku w Warszawie. I mało tego, łostali docyniyni. Jich płyta dostała trzecio nagroda w konkursie na Folkowy Fonogram Roku. Som my skisz tego w zocy z tyj nagrody, bo naszym Ślonskiym trzeja sie asić i go pokazywać w świecie, ale tyż robić to tak jak łoni, z wielkom krasom i na wysokim poziomie. A dzisio spotkali my sie z Adamym, coby pogodać ło tym, jak to wszyjstko u nich wyglondo.

Jak podchodzicie do muzyki, kiero robicie? Co łona Wom daje? Podug Wos nojlepszy Wasz konsek to… 

Muzyka, kiero gromy je z syrca, skisz tego podchodzymy do nij fest emocjonalnie. Chocioż nasz projekt skupio muzyków z cołkij Polski, ale jego głównom osiom je duet mój i Dominiki Kontny – kiero śpiywo. Od tego wszyjstko sie zaczło I durś chcymy to rozwijać. Muzyka daje nom frajda i okazja do pokazywania tzw. tradycji ślonskij w inkszy sposób. Nojlepszy konsek – ni mom. Wszyskie som inne, i majom swój luft. A jo mom rod jak jest roztomajcie, a niy na jedno kopyto.

 Barzij wolicie wystympować na takich konkursach dejmy na to jak Nowa Tradycja, czy raczyj kaj żodyn Wos niy ocynio? Był sztres?

Ja , sztres był. Bardzo my chcieli sie pokozać. A niy było to łatwe – przez 20 minut pokozać wszysko, co by sie chciało. Beztóż jo wola normalne koncerty, kiedy mogymy zbudować ta wiynź ze publicznościom. Z tym ocynianiym też jest roztomajcie, ale jak sie udo coś zdobyć to jest fajnie. A przeca projekty ślonskie raczyj sie niy pokazujom. A jo sie bardzo ciesza, ża naszo płyta zdobyła 3 nagroda w konkursie na Folkowy Fonogram, bo dlo mie to jest tako misja pokazywać godka ślonsko inaczyj. Jo mom rod folklor z Mazowsza i Kujaw i spod Tater, ale jak żech sie sam urodził to szukom tukej.

fot. Grzegorz Śledź/PR2
fot. Grzegorz Śledź/PR2

Jak żeście sie czuli? Jak Wos przyjyni na NT w radioku warszawskim?

Festiwal jest bardzo dobry, dobrze zrychtowany. Przyjyni nos dobrze, poznali my ciekawych muzyków, grajków i śpiywoków – niy yno z Polski. Polecom kożdymu.

Wiela czasu zajyno Wom same przygotowani tych pieśniczek?

Wiela czasu – ciynżko pedzieć. To trwo cały czas. Durś wynajduja coś nowego i próbuja przisposobić. Konski na płyta „hurdu_hurdu” od zebranio do nagranio zajyny koło roku. A łoprócz tego cały czas sie spotykom z Radostowiankami, paniom Jadwigom i coś tam sie ucza. Potym to aranżuja , próbujymy z Dominikom i idzie w świat.

Zdo sie, że mało je zespołów ze Ślonska, kiere grajom muzyka folkowo. Czymu tak je?

No , to jest ta bolonczka. Ale co poradzić. Może nagroda dlo naszej płyty pomoże. Jo myśla że ludzie ni mogom kojarzyć piyknego ślonskigo śpiywu yno z festynym abo karczmom. To jest dlo nos szukani tożsamości, a dlo innych muzyków niy – Ślonzoków – egzotyka. Taki miszung.

A jak u Wos z nowymi konskami? Robicie juzaś co nowego? 

Cały czas szukom nowych, fajnych konsków. Ni ma to taki proste. Jest tego trocha tu i tam, ale skuli roztomaitych rzeczy niy wszystko mi sie podobo. Może jes żech wybredny, ale niy chca iś za bardzo na kompromis w muzyce.

Czego momy Wom winszować?

Możecie nom winszować wyny i chyńci do granio, śpiywanio i muzykowanio. Bo wtedy to wszyjsko idzie z duszy, a ło to sie rozchodzi. Nawet jak jest trocha na opy.

Kaj bydzie nastympny Wasz kocert?

Nastypny koncert bydzie  22 czerwca u Starosty pszczyńskigo, a potym 27 lipca w Konstantynowie Łódzkim w ramach festiwalu objazdowego Filharmonii Łódzkiej: Kolory Polski 2013. Zapraszomy serdecznie do hurdanio.

Fest Wom gratulujymy i w Waszym imiyniu zapraszomy wszyjstkich na Wasz koncert do Pszczyny. Niy trzeja nic płacić!

W radioku grali tak:

http://www.polskieradio.pl/8/22/Artykul/847939/

A wiyncyj ło koncercie we Pszczynie tukyj:

http://www.powiat.pszczyna.pl/wiadomosci/2224-powitanie-lata-w-ogrodzie-starostwa-powiatowego-w-pszczynie

Tekst:
Klaudia Roksela

Co byś na to pedzioł?

fot. Radosław Kaźmierczak

Skond sie wzion glacok?

Dlo jednych frelek glacate chopy som gryfne, dlo inkszych niy, a jeszcze inkszym to je egal. Prowda je tako, że moc glacoków łazi po tyj ziymi, czy momy radzi to czy niy.

WIYNCYJ »

evan-kirby-104799

Ło szoferach i jich rajzach

Niy kożdy lubi szoferować. Jedni wolom siednyć na zadnim zicu i se kimnyć, inksi zaś wtynczos poczytać, abo pofoflać bez mobilniok. Ale som tyż tacy, co łod kierownicy niy łoderwie ich ani rugcugiym

WIYNCYJ »

fot. Radosław Kaźmierczak

Fet

Łoroz przidzie smak na coś fest prostego do zmaszkecynio. Mom tukyj we gowie fet – tuste. Styknie ino pora minut i sie je pojedzonym. Bo łon fest długo poradzi czowieka trzimać.

WIYNCYJ »