Gynsi pympek – wywiad

fot. Szymon Król
fot. Szymon Król


Dziyń frelek, zolyty, gyburstag abo weseli, co to mo wspólnygo? łodpowiedź je yno jedna! Kwiotki! Rozprawiomy z Dagmarą Krząkałom kiero kludzi kwiaciarnia Gynsipympek w Swiętochłowicach i godo prziy tymu po ślonsku.

1. Skuli czego żeście mianowali swoja kwiaciarnia gynsipympkiym?

Szukałach nazwy inkszy łod innych, co bydzie grać i z kwiotkami i ze Ślonskiem. Moja kwiaciarnia jest w śwuytochłowicach, a tu sie zowżdy godało.I tak przi tych poszukiwaniach łoblykłach się bez przipadek tresek łod Gryfnie – Gynsipympek, coch go dostała kiejs łod mojigo chopa ne geszynk – i tak sie problym rozwionzoł.
Rozważałach jeszcze Boli Oczko ;), ale to by zaś niekerzy mysleli że jakiś doktór łod ucz gabinet otwar…

2.Ludzie sie Wom pytajom ło ty miano? Wiedzom ło co sie rozchodzi?

Gynsi Pympek to w mowie polski stokrotka. Do mie to je nazwa oczywisto, ale niy kożdy rozumi ło co sie rozchodzi…. Jak żech tyn geszeft rychtowała to niekyrzy byli przekonani, że jako garmażerka się szykuje… :) tym barzi, że lokal mom po pizzerii :) (Jak już otwarłach to roz nawet jeden synek wloz i sie pyto czy już sie może pizza zamówić, a godom wom wcale u mnie nie wyglondo jak w pizzeri…) Hanysy mi fest przajom skuli ty nazwy, a inni sie uczom nowego ślonskigo słówka. Nie jednyn sie fest chichro.

fot. Szymon Król
fot. Szymon Król


3. Je tela roztomajtych kwiaciarni, powiydzcie nom co je u Wos takigo czego niy majom inksi?

Wyjontkowo kwiaciarka :D Taki drugi frelki nikaj niy znojdziecie !
A tak na serio to mom oferta, keryj w okolicy nie mo żodyn! Jako jedyno w Swiyntochlowicach oferuja:

  •   wybrane produkty łod Gryfnie a inksze na zamówienie – połowa Świonów już łazi w Waszych zokach :),
  •   balony na hel i na luft – łod koloru do wyboru – na roczek, na abrahama, na silwestra, na kożdo okazjo,
  •   tzw. lasy w szkle, kere sie chwolom ludzie we fyrmach, bo nie cza o nie szczególnie dbać, ino łod czasu do czasu podloć,
  •   miody ze ekologicznyj pasieki z róznymi dodatkami np. z melisom do tych to co sie gibko nerwujom.
  •   a jak ktoś chce miec gładki pysk to sie może sprawić peeling, masekszka abo mydełko zrobione yno ze naturalnych składników.

Ale przede wszystkim mom kwiotki prima sort. Zawsze swiyże i piykne i o wszystkie dbom jak ino idzie – kożdy kwiotek dostaje odżywka do wody, a na noc, chowom je do spcecjalnyj chłodni, co by mioły odpowiednio wilgoć i tymperatura. A i jeszcze sie pochwola, że tyż mom klima – bez kero w ty moi moi kwiaciarni mom stało temperatura ok. 16-18 stopni. i w lato i w zima.

4. Kwiotki u Wos majom ślonski nazwy?

Jeszcze nie mom tabulek z nazwami kwiotków po naszymu, ale bydom. W gowie mom pełno pomysłów, a to tak wszistko łoroz sie niy do pochytać…

5. Som jaki ślonski tradycje, kiere sie tyczom kwiotków? Dejmy na to strojynio sali na weseli? Abo inkszych uroczystości.

Od razu na myśli mom Ziolene Świontki. Z resztom, jak sama nazwa keruje. Na te swiynta zdobi sie chałupy kwiotkami i inkszym zielem. Trza jednak prziznać, że terozki mało kto to praktykuje. Barzi możno na wsi. W mieście tego nie widza, a jak już to u starzików.
Co sie zaś tyczy weselo, to ślonke Pani mode sie życzom piykny wianek na gowa. I to mi sie zdo jest tako tradycjo co nos – Ślonzoków wyróżnio. A i jeszcze se tak myśla, że tako szlaga, to na zicher mo być piyknie kwiotkami umajono, a nie ino jako żyła przeciongniiono co by na gibko halba dostać…

fot. Szymon Król
fot. Szymon Król


6. Z ludźmi co do Wos przyłażom czynściyj godocie abo mówcie?

A to różnie. Zależy kto przidzie. Dycki tyn nosz geszeft to nie ino do  Ślonzowków jest… A u nos na osiedlach tyż wiela przijezdnych. Do kożdego żech jest na pewno tak samo życzliwo. A jakżech kogoś uraziyła, to bardzo przepraszom.

7. Jaki kwiotki, frele na ślonsku lubiom dostować nojbarziyj?

Królowo jest ino jedna… Róża. Czy gorolka czy ślonzoczka, kożdo frelka kocho różyczka. A odmian i kolorów jest tela, że sie w gowie nie mieści.

8. Som jaki świynta abo okazjie na Ślonsku, kiedy ludzie gupiejom i lecom kupować kwiotki na potynga?

Ja, pewnie że som. Ale cza pedzieć, że to niy som ino ślonske świynta. Myśla tu noj som przód ło dniu Mamulki dali to bydzie bydzie dziyn omy i opy, dziyń kobiet i dzyń św. Walka, co to był nie downo.

9. Poradzicie nom zdradzić jaki ślonski sekret dziynki kieremu wszyjstko bydzie gryfnie rosło?

Mie sie zdo, że to cza być dobrym czowiekiem. Jak ktoś jest szpetny, to sie go kwiotki nie bydom czimać… I nie godom tukej o wyglondzie, ale ło tym co w czowieku siedzi.
Pewnie, że dobrze tyż mieć do kwiotków grajfka i czasem z nimi pogodać i na nie lukać łod czasu do czasu czi aby niy majom za sucho.
A jak ktoś mo już cołkiym ptoka na pynkcie tych kwiotków, to niech im nawozu nasuje, bele niy za wiela bo padnom.

Tekst:
Szymon Król/Dagmara Krząkała

Co byś na to pedzioł?

fot. Radosław Kaźmierczak

Karminadle

Je u nos takie jodło kiere niy mo yno jednygo miana: kabinadel, karminadel abo jeszcze  inakszyj? Jakby go niy mianować to nojlepiyj smakuje na Ślonsku!

WIYNCYJ »