fot. castgen

Czymu je tak, że dzisio corozto wiyncyj ludzi, tak gibko wyproszczo szłapy? Jedyn powiy, że to skuli luftu, drugi, że to skuli tego zwiyrza, co chyci czowieka w swoji klyszcze i fest zacisko, aż na Amyn. To je wszyjstko prowda! Jak sie chce dożyć swojich prawnuków, kaj tam, niykierzy i wnuków to trzeja trocha se dać na wstrzimani. I jo Wom tukyj dom tako recepta na długi życi.

Niy bier pili
Niy lotej zaroz do aptyki po ty roztomańte medikamynty, jak cie ino łeb zaboli, abo w krziżu chyci. Po piyrsze, to i tak nic niy do a po drugi jednom pilom naprawisz se ciśniyni a zepsujesz żołond. A potym to Ci to jeszcze w byfyju leży i sie na to kurzi i ino czekosz coby to wyciepać jak bydzie stare.

Worz se som
Jodło teroz momy fest popaprane. Lepij czasym niy sztudiyrować tych abcybildrów na roztomajtych rzeczach, bo ci sie tablica Myndelejewa przed łoczami pokoże. Lepij tyż niy śniodać ani jeść łobiadu we tych roztomajtych restauracjach a to skisz tego, że łoni tam po toniu, i ledy jak. A potym z tego ino drapszajs i kupa łostudy. Jak cie ino głód przyciśnie, to se weź sznita chleba abo naworz kartofli. To bydzie zdrowsze.

Niy gorsz sie
Kożdy ino loto za tymi pierzińskimi kotlokami i rubszymi. Ino kupa stresu skisz tego. Bo tukyj cie szef gorszy, tukyj żeś co złonaczył, a żodyn tego niy chce. I ciśniyni mosz potym 200 na 180. A na co to komu?, sie pytom. Dej se na wstrzimani i niy gorsz sie. Bo jak ty sie zgorszysz, to wcale potym niy bydzie lepij.

Idź na luft
Luft momy, jaki momy. Nic na to niy poradzymy. Ale lepij na tyn luft wyłazić, niż siedzieć w sztyrech ścianach. Bo jak sie czowiek trocha poruszo, to jodło barzij smakuje, szłapy trocha odżyjom i krew lepij leci.

Śmiyj sie
I łostani, nojważniyjsze! Śmiyj sie chopie! Chocioż ci niy ma do śmiychu. Świat wtedy je piykniyjszy! Inksi sie radujom, kiej ty sie radujesz. Łoroz zaczyno Ci sie chcieć żyć.

Poleku idzie wiosna, nowe życi sie zaczyno, ptoki napocznom świyrgolić, kociki śpiywać. Weź sie za siebie łod razu. Niy czekej długo, coby potym inksi niy musieli ci stowiać lampki na kierchofie.