fot. Allan Foster

Idzie podzim, za łoknym coroz czynści lecom żaby z nieba, a ze stromów listki. Fynstry we autach z rana zaparowane. To je znak, że se podzim ciśnie miyndzy futrziny a zaroz za niom choby drużki za młodom paniom, deptajom roztomańte choróbska.

Lyki niy z aptyki

Zaś bydymy łazić uciompani i zakuckani. Je to pieronym oklane na podzim, bo se to kożdygo roku powtarzo, ale za to wiymy jak tymu zaradzić. Najprości kopsnyć sie do aptyki i se co kupić na ryma i na kuckani. Najprości nie łoznaczo, że nojlepszy. Idzie najprzód popróbować syropu z cebule, tyju z lipy, wrawej wody ze citronym, wodzionki z wiynkszom niż zawdy dawkom czosku. Naturalne lyki trza dłuży brać ale przinajmi nie wciskomy do sia chymie. Bo tyż po tych lykach mogymy dostać drapszajs. Ni ma to fajne co kwila lotać do hajźla, bardzo już ni ma tam co zostawić, ale basym cołki czas wyrobio. Gorski tyj i po konsku szkubać żymła. Yno jak nie pomogo to trza riktik se kupić jakiś „zatrzimowacze” żeby se nie łodwodnić.

Dzwonić po dochtora, abo niy?

Gorszy jak człowieka chyci heksynszus. To je pierziństwo, bo pierońsko boli w puklu, tak że se ani ruszyć nie idzie. Z boku na bok w kotyroku łobracosz se sztwierć godziny. Taki poszczał se som od sia nie przyndzie. Tu już musi Wom kery iść i kupić coś łod boleści. Czynsto to tyż niy pomogo. Wizyta u dochtora Was niy minie, a potym pewno szpryce do połżitków. To je nojbardzi skuteczne ale tyż nojbardzi czuć. Po taki szprycy jak Wom jom piguła zasadzi, to płaczki polecom bez lica. Na zicher. Jeszcze nic inkszego żodyn niy wymyślył, tak żeby niy bolało.

Bier se to z rozwagom

Takich roztomańtych przipadłości w tyn czas je wiyncy. Yno ni ma se co nerwować skisz tego. Tak je i szlus, a z takich nerwów to idzie yno hercklekotów dostać. Lepszy  wylyźcie se na luft, troszka podeptać, abo na kole pojeździć, trocha se poruszać. A jak Wos co riktik chyci to tyż ni możecie tego osmolić, bo dbać o sia trza. Yno też żeby jak Wos trocha kajś „szczyknie” zaro niy grzebać w krzince z lykami. Roz dwa te miesonce śmignom i wiosna zaś przidzie!