Jak znojść chopa/baba? - Kultura - gryfnie

Jak znojść chopa/baba?

fot. Joe St.Pierre
fot. Joe St.Pierre

Loto po tym świecie tych roztomajtych zortów babów i chopów. Ale jak tukyj wybrać tego jedynego?

Som tacy, co se padajom, a jeszcze mom czas: a dyć ni ma żodnego fajnego. Ja, no jo niy godom, że trzeja brać z drogi i sie łod razu żynić niy, niy. Ale im, czowiek starszy, tym mo myjszo ciyrpliwość do bajtli. A tyż zaś jak sie mo trefić na ledy kogo, to lepij se łostać kawalyrym abo starom pannom i sie niy gorszyć z takim dziadym.
Teroz tyż już ni ma tych, co to rajtujom na czornym koniu. Trza brać co je ale ino z gowom!

W cugu, we robocie abo i internecie
Baba/chopa idzie znojść ledy kaj. I w cugu i w robocie, we szkole i na muzyce, nawet tyż na zajcie w internecie se idzie pozolycić. A jak sie szuko i dalij nic, to jeszcze pozostowo rzykani. W tym wszyjstkim coch tu padała trza se ino dać pozór, coby wzoś ta co je nojlepszo partia. A jak to zrobić?

Z piyknej miski niy pojysz

Po piyrsze, jak to godajom, z piyknej miski niy pojysz, toż ni ma co podziwać sie na fajno gymba abo wosy. Bo fajno gymba niy uwarzy Ci łobiadu, a niy podo szolki wody jak bydziesz niymocny.

Po leku ze słodzynim
Po drugi, jak Ci ino dzióbkuje i słodzi to tyż ni ma dobrze. No łod czasu, do czasu, to tak fajnie se pomaszkiecić ale niy za wiela, bo to sie potym gibko zmierznie. A taki co mo ino w gymbie a niy w rynkach, to je nic wort.

Wejrzij na ji fatra
Po trzeci, wybier sie tyż ino na gościna do jeji/jego łojców i łobocz se jacy łoni som. Czy sie fatrowi chce z ryczki zlyźć i tyju nawarzić, czy siedzi i ino durś rezkiruje a podej a przyniyś a pozamiatej. Abo czy mama ino bigluje i przonto a reszta gowiedzi siedzi i dycho.

Trzeja se go zaklepać.
Jak sie już znojdzie, i sie wydowo, że to je ta. Ni ma co  czekać za dugo z tom żyniaczkom, bo już sie znodło poru co sie niy doczkali i se dali pokój. Toż jak sie je doś pewnym, że to je tyn abo ta to trza ji dać pieścionek i szlus.

Szlus
Je prowda, że i tak wszyjstkigo sie niy dowiysz przed żyniaczkom. Potym dziepiyro wyłazi co to za pieron i jak ciepie zoki kole wyra. A jak sie mu powiy, coby tak kupa łachów, kiero je na wyrze posprzontoł, to jom przeciepnie na szislong i powiy, że gotowe.

No ja, ale taki je życi, roz na wozie a roz pod wozym. Ale nojważniyjsze coby sie trzimać zawdy razym i niy dać tym roztomajtym dioskom. Pamiyntejcie, zawdy idzie trefić gorzyj niż sie miało.

  • 14.02.2016

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.