Makówki

Ni ma u mie w doma Godów bez makówek. I to niy, że ino tako jedna mało faska. U nos tego idzie tela, że chneda niy styknie misek, gorczków i inkszych. A skisz tego, że zaroz bydymy sie za nich brać, dzielymy sie tukyj z Wami naszom recepturom.

fot. gryfnie
fot. gryfnie

Co potrzeja na jedno wielko miska?

  • 25 dag zemlonego maku
  • jedna sztrucla
  • liter mlyka
  • 2 łyżki miodu
  • 2 łyżki łomasty
  • mandle, rozinki, łorzechy abo kokos

Toż bierymy sie do roboty:

  1. Sztrucla pokroć na szlajski i wrazić jedna wele drugij w pojszczodku miski.
  2. Warzić mlyko tak długo, aż bydzie dźwigać sie na wiyrch, ale niy wykipi.
  3. Wsuć do mlyka zmlety mak i cołki czas miyszać, coby sie niy chycił. Dalij do tego wciepać masło i miód i dalij miyszć. Mak musi zmiynknyć.
  4. Na sztrucla dać troszka łorzechów i rozinek i zaloć to tym uwarzonym mlykiym.
  5. Zaś ułożyć sztok ze sztrucli, posuć łorzechami i rozinkami i zaloć mlykiym. a tak to długo ukłodać aż bydzie koniec miski.
  6. Trzeja pamiyntać jeszcze, że makówki muszom być dobrze namoczone (mi taki szmakujom). Jo jeszcze wrażuja łyżka i robia w pojszczodku miski dziura, coby mlyko wszyndy sie dostało i sztrucla sie dobrze namoczyła.
  7. Na wiyrch to wszysko trzeja posuć kokosym i udekorować mandlami abo łorzechami.

Tak robiła makówki moja babka robi moja mama a teroz robia je jo i mój chop a to skuli tego, że mie łone nojbarzij szmakujom i dobrze się po nich spi. Z takom miskom som my do wieczora gotowi. Trzeja ino wiedzieć że mak je ciyżki i spożywany w wiynkszych ilościach może przyniyść niyspokojno noc.

U Wos tyż tak sie robi makówki? Mocie je radzi? Pyrsk!

Tekst:
Klaudia Roksela

Co byś na to pedzioł?

fot. Szymon Król

Skond sie wziyna klopsztanga?

Kiej sie zastanawiocie kaj sie downiyj na Ślonsku łozprawiało na roztomajte temat, łod wspominków po polityka to momy dlo Wos łodpowiedź! Przi klopsztandze!

WIYNCYJ »

fot. Radosław Kaźmierczak

Swojski buchty

Tyn, kierego bawiła starka w doma zawdy zno smak prawdziwych buchtów. Som jeszcze buchty, kiere sie pamiynto z przedszkola. Ale to niy było to samo, co wyrobiane w doma przez stareczka i z wielkigo przonio.

WIYNCYJ »