Wongiel, nasz nojwiynkszy ślonski skarb. Dziynki niymu moc ludzi mo robota. Dziynki niymu tyż moc ludzi mo bez zima gorko w doma.
Niyroz znoloz łon tyż swój plac na roztomajtych łobrozkach, ksiożkach, łopowieściach.

Łod jakigoś już czasu przajom wonglowi tyż projektańci. Bierom go i łonaczom śnim wszyjstko, co ino majom w gowach. I niy myśloł by czowiek, że tela idzie z wonglo zrobić. A wiela? Idzie sie to wszyjstko łoboczyć, jak sie przidzie na wystawa, kiero sie mianuje „Węgiel BOOM!”

Na wystawie som pokozane dizajnerski projekty w kierych wongiel mo swój plac. I tak, idzie sie łoboczyć mydło choby wongiel, lampa, załuśniczki i pieścionki z wonglym, łobleczyni i inksze rzeczy ło kierych niy bydymy tukyj godać, cobyście przyszli i sami połoglondali, pra.

Toż zapraszomy Wos gryfnie na wernisaż dzisio – 14 września ło godz. 18 – kierego prowodirym je Marta Frank. Już jom znocie, bo my ło nij już godali.

Bydzie tyż szło posłuchać, jak śpiywo Brynica. Niy wyleziecie tyż stamtond z głodym bo bydzie szło zmaszkecić ślonski żur.

A wto mo teroz pełniyjszy portmanyj bydzie móg ty pokozane rzeczy se sprawić i przy łokazji wesprzić Fundacja „Choice to Choose”.

A wto mo tela roboty, że niy do rady przyjechać, to wystawa bydzie jeszcze se szło łoboczyć do 3 października 2013.

Kiej byście sie chcieli jeszcze czego wiyncyj dowiedzieć, to tukyj mocie oficjalny profil internetowy:
https://www.facebook.com/WegielBOOM

Toż ciście na „Węgiel BOOM!”

Kiedy i kaj?

Wernisaż: 14 września godz. 18:00, Galeria Miasta Ogrodów w Katowicach, ul. Stanisława 4.
Wystawa: 14 września – 3 października 2013.