fot. Marco Nedermeijer

Szkolorz to je po polsku uczeń.

Szkolorz to je tyn, co łazi do szkoły. Je tak długo szkolorzym, jak długo sie szkoli we szkole. Potym może być jakimś fachmanym, rechtorym abo farorzym.

Niykierzy godajom, że szkolorz to je tyn, co łazi ino do podstawówki. Szło by jeszcze pedzieć, że to je gimnazjalista. No mo ty piytnoście roków. Jak już wtoś łaził do liceum, to sie raczyj na takigo szkolorz niy godało.

Kożdy szkolorz mo pukeltasza pełno heftów, krykloków, ksiożek, no i do pisanio filok.  Kożdy tyż mo legitka, kiero sie dość czynsto traci.

Downij kożdy szkolorz był łobleczony tak samo, w taki mundurek z biołym kraglym. Tyn kragiel był przypinany kneflami i matka co 2 dni mogła se go odpiąć i wyprać. Niy trzeja było wdycki go prać w całości.

Kożdy szkolorz uczy sie pisać, czytać i rachować. Na Ślonsku kiejsik łaziło sie do szkoły jak sie miało 10 lot. Człowiek jak mo tela lot, to dziepiyro je w stanie umieć samodzielnie myśleć, tak sie godało.

Nośmiyszniyjszo ocyna, kiero szło dostać to było 3 na glajzach, czyli 3 na szynach. Ani umia ani niy umia.

Czasym znojdzie sie taki przichlast, kiery nerwuje zawdy inkszych. Zawdy coś wynokwi do gupot. Roz taki jedyn przysmyczył do szkoły elektryczno szczoteczka do zymbisków i szterowoł niom dziołchy. Haja była potym jak pierzin!

To, co sie czasym zdarzo szkolorzom, jak niy zrobiom zadanio, abo jak sie niy nauczom na klasówka, to chodzyni na baje. Nojgorzyj jak sie potym łojce ło tym dowiedzom, do dziepiyro je w doma haja. Teroz już możno ni ma tak źle, ale downij to trzeja było se wrazić zogłówek do galot, coby tak niy było czuć tacinego poska.