Sznupie sie na szybie, sznupie na przodku, przy kożdyj cygaretpauzie, abo raczyj sznuppauzie, by trzeja było pedzieć.

Trzeja se dać ino pozór, bo kiej sie ji biere wiyncyj to idzie mieć potym popapane ze śluzówkom. Idzie sie tyż łod tego uzależnić, tak jak łod cygaret. Toż za sznupani lepij sie je niy chytać.

Downij szło kurzyć na grubie. Cygarety łodpolało łod karbidki, ale kiej tego zakozano, grubiorze musieli se radzić inakszyj. Bestoż zaczli sznupać.

Prawdziwo sznupaka to je fest drobny tytoń. Mogom być łone bronatne abo czorne. Je tyż jeszcze bioło, myntolowo. Idzie se jom narychtować w roztomajtych szmakach. Dejmy na to styknie ino dać skórka z apluziny abo kapka myntolu.

Som tyż tacy, kierzy dejmy na to majom sztyry abo piyńć takich sznupak łobwionzanych szkotym i dowajom, co se idzie wybrać.

Sznupani je ważnom rzeczom na grubie. Trzeja sznupać kiej sie przyłazi na przodek. Cołki sznupani wyglondo tak, że suje sie na rynka tako kryska i wciongo.

Kożdy powiniyn mieć swoja sznupaka i poczynstować niom przodowego i inkszych kamratów. Kiej sie jom wyciongo to je pauza w robocie. Godo sie wdycki przy nij ło roztomajtych rzeczach.

Ale sznupać mogom tyż ci, kierzy robiom na wiyrchu. Styknie ino wejrzeć na jich jakla i kiej je tam nasute, to sie już wszyjstko wiy.

Kiej by sie chciało jako sprawa załatwić abo je sie piyrszy roz i coby sie wkupić miyndzy chopy, taki blank śleper dowo inkszym posznupać.

fot. Radek Kaźmierczak