fot. Kevin Conor Keller

Hut to je po polsku kapelusz.

Słowo wziyno sie z niymickigo. Niykierzy Ślonzoki godali tyż kłobuk abo kapelka. Ale zaś kapelka dlo niykierych to je taki chopski beret.

Hut może być i dlo chopów i dlo babów. Chocioż niykierzy prawiom, że tak sie godo ino na chopski nakryci gowy.

Nojwiyncyj chopy łaziły w takich ciymnych hutach. Ni miały łony jakigoś fest wieligo ronda. Ale w hucie niy kożdy móg łazić. Kiej wto był jakim podrostkiym, to mu to niy przystowało. W hucie, łaził ino chop, kiery mioł już swoji lata. A łaziło sie w nim, bo to było taki elegancki. Przed wojnom niy było takigo chopa, kiery by niy łaził w hucie.

Niykierzy tyż poradzom wymiynić wiyncyj niźli jedna zorta huta.

Ledy jaki hut, to była kipa. Kiej chop był takim zabranym panoczkiym to łaził w pliszhucie czyli hucie ze filcu. Potym je jeszcze sztajfhut, to zaś je taki kapelusz fajnie wymodelowany. Som tyż jeszcze dyńcioki czyli meloniki. I jich niy idzie biglować, bo som fest twarde. Lyjderhut to je zaś kapelusz skórkowy, w kierym nojwiyncyj łażom kowboje w Hameryce.Kiej już zaś przidzie lato, to sie łazi w słomioku abo sztrołhucie. I jeszcze je hut taki, w kierym lotajom ty chopy z Łoktoberfestu i tyn sie mianuje tyrołlynhut.

Łostoł nom jeszcze cylinder, w kierym łażom cyrkusy. I to je jedyny hut, kiery idzie klapnońć. Łon sie robi plaskaty a potym zaś go idzie klupnyć ło rynka i je normalny.