Grzegorz Buchalik

Tych, kierzy przajom fusbalowi je mocka. Jedni jeżdżom na wszyjstki szpile tych, kierym kibicujom. Inksi siedzom w doma i przed telewizorym podziwajom sie na swojich. Zaś Grzegorz Buchalik wzion sie za podsumowani tydnia po naszymu.

Trocha my se śnim ło tym pogodali.

Skond u Ciebie taki zamiłowani do fusbalu i pisanie ło nim po ślonsku?

U mie w rodzinie wszyscy byli, abo sōm fusbalistami, fol działało i działo tyż w szporcie (Iskra Rowień). We fusbal grom od bajtla. Zawsze tyrołech ze starszymi (bratym, kuzynami i ich kōmplami). Gralimy na placu, abo na takij łōnce za chałpōm kuzyna, kaj mielimy poszykowane bramki. Nikiedy kopalimy tyż balym z papiōru u mie w izbie (aż sie babcia niy znerwowała, że nij gipsdeka na gowa leci i niy zaczła trzaskać w grzejnik). Jak nōm zlikwidowali boisko na dworze ,,Za Bastkiym” (za dużo butlu my robili), to zrobiylimy se nowe na takij łōnce w lesie. Niyrowno było jak pierōn, ale mi sie tamek fest podobało. Boisko mianowalimy ,,Forest Stadium”.

Myślołeś może nad tym, coby komyntować szpile na żywo?

Z tym kōmyntowaniym to trefiliście. Zawsze mi sie marzyło coby kōmyntować jakiś fajne fusbalowe szpile po ślōnsku (jakbyście mieli jakoś tako posada dō mie to biera w ciymno). Ślōnski kōmyntarz tak jak te relacje to jes wielki niywykorzystane pole. Ludziōm bydzie sie to podobać. Trza sie yno przebić.

fot. Linh H. Nguyen

Mosz jakigoś swojigo ślonskigo fusbalera, kierymu fest przajesz?

Dalij grōm we fusbal w Iskrze (A-klasa, Podokryng Rybnik). Z naszych fusbalistōw zawsze lubiłech Jerzego Dudka (jak groł jeszcze w Concordii Knurów to w dwóch szpilach z Rowniym puściōł w sumie 3 gole).

A jak to je, to ty na ty wszyjstki mecze jeździsz? Jeżeś fanym?

Kibicuja wszyjskim ślōnskim klubōm, ale na mecze raczyj niy jeżdża. Pora razy byłech na szpilach reprezyntacji Polski na stadiōnie. Ostatnio byłech tyż na Euro we Wrocławiu (tam kaj studiuja) na spotkaniu Grecja-Czechy. Nikiedy lepij sie podziwać na te regiōnalne małe kluby z niższych lig, niż na naszo Ekstraklasa. Chocioż na Ekstraklasa tyż sie dziwōm, ale raczyj yno w telewizorze.

Downij na Ślonsku fusbal był fest ważny, zdo mi sie, że sie tyż wiyncyj w niego grało, czy teroz tyż tak je?

Co do tej popularności fusbalu na Ślōnsku to prowda. Przed wojnōm grali przeważnie w palanta, ale niyskorzij już wiyncyj we fusbal. Kożdo mało wieś musi mieć swōj klub (prestiż). Myśla, że dalij tak jes. Nasi ojcowie, starziki grali we fusbal belekaj np. na rżysku. Tera łebki majōm przeważnie pod nosym gotowe boiska, orliki i tyż grajōm. Chocioż jes tyż fol takich kierzi wolōm szpilać na kōmputerze. Ich strata.

A tukyj idzie sie poczytać łostatni podsumowani tydnia po naszymu:

http://www.silesiansport.pl/component/newsy/1594-podsumowani-tydnia-po-naszymu-czesc-xv.html