fot. Radosław Kaźmierczak

Kiej biera sie za warzyni, mama mi godo, cozaś bydziesz to ciaprać? Mamo, niy starej sie, niy spola Ci kuchnie, byda ciaprać ciapkapusta :) Kiej mama to ino dosłyszy zaroz leci do pywnicy kaj stoji srogi bunclok i wybiyro z niego swojsko kapusta, kierej woń czuć potym po cołkij chałpie. Napoczynomy wielki warzyni małego ale jak richtik dobrego jodła:

Co nom bydzie trzeja:

250 g kiszonyj kapusty
500 g kartofli
2 cebule
2 zombki knoblauchu
5 dag wyndzonki
2 łyżki oleju
listek bobkowy
3 szt korzynio wonincego (ziele angielskie)
1 łyżeczka magi
świyżo zmlety pieprz
sól

Jak to sie robi:

• Kartofle łoszkrobać, uwarzić, ino ich niy rozwarzić. Wzoś sztamfer i jich posztamfować. Idzie tukyj cyknyć trocha soli, kiej zeście se zapomnieli ło tym przed uwarzynim.
• Kiej jich łocedzicie to niy wylywejcie tyj wody z warzynio, bo czasym sie przidarzy, że kartofle som fest suche i kiej sie tak zdarzi, to idzie kapnyć tyj wody do nich. Znom, tyż takich, kierzy żyjom fest dugo, kiej potym ta woda ze kartofli cołko pijom duszkiym.
• Jedna cebula, knoblauch i wyndzonka pokroć w drobno kostka, zesmorzić na łoleju. Jak sie ni mo wyndzonki idzie tyż dać szpek.
• Tyn miszong wciepać rajn do tych kartofli, zamiyszać. Niych trocha przyndom.
• Dalij wzoś sie za kapusta. Ta drugo cebula tyż pokroć i zesmorzić na łoleju. Do tego ciepnyć ta kapusta, nojelpij jeszcze wcześnij pokrono i kiej sie do to jom trocha wypuczyć, z tyj kwaśnyj zajzojery. Niych troszka sie przesmarzi, to chyci takigo fajnego smaku.
• Jak chyci, to zaloć jom troszkom wody. Ciepnyć ji tyn listek bobkowy, korzyni wonionce, pieprz i tyj magi. I niych se tak pyrko z 20 min aż zmiyknie.
• Potym ta kapusta rajn wciepać do tych kartofli i fest wymiyszać.
• Tyn maszket idzie jeść som abo z nojlepszymi jego kamratami, czyli karminadlami abo żeberkami. Mmmmmm

fot. Radosław Kaźmierczak

Te maszkety, kiere tukyj momy pokozane na łobrozkach, uwarziło dlo nos Pole do popisu. To je katowicko ekstra kuchnia w kierej nauczom Cie warzić tak, że żodyn Ci niy powiy że mu niy smakuje a ino bydzie jod aż mu sie bydom uszy trzyńść. Zapraszomy na http://poledopopisu.pl