fot. Radosław Kaźmierczak

Tela je teroz wszyndy tego wydziwiatego jodła. Czasym to już sie aże czowiekowi odechciywo, łod samego podziwanio sie. I łoroz przidzie smak na coś prostego. I mom tukyj we gowie fet – tuste. To je woń i smak za czasów jak sie było bajtlym abo teroz jeszcze idzie go trefić w jakich karczmach ze swojskim jodłym. A kiej by se go tak w doma narychtować? Postawić w jakim chłodku i szmarować kiej ino przidzie głód. Ja, to je to, w som roz na długi, zimne jesiynne dni.

Co nom bydzie trza?

• 80 dag szpeku
• 3 srogi cebule
• 3 jabka
• 150 gram wyndzonki
• 2 łyżeczki soli
• pieprzu na łoko
• majeronek

Jak to sie robi?

Ściepnyć skóra ze szpeku. Kiej sie jom łostawi, to po zeswkorzyniu zrobi sie twardo i bydzie szczyrkać miyndzy zymbiskami, abo gorzij, idzie se na nij złomać zymba.

1. Szpek pokroć na małe konski (im myjsze tym lepsze, niytrzeja potym za fest gryźć). Niykierzy tyż przepuszczajom go bez flajszmaszina.
2. Cebula i jabka pokroć tyż najdrobnij jak poradzicie.
3. Wciepać szpek do jakigo tyglika, posolić i zeskwarzić. Tak kajś z 15/20 minut niy na za wielim łogniu. Pamiyntać ino coby co jakiś czas go tyż przemiyszać. Coby sie niy przychycił
4. Kiej bydzie sie robił taki złoty, dociepnyć ta cebula (tak coby sie tak fajnie zbronociła) i wyndzonka. Tukyj tyż jeszcze trocha tego majyronku i korzynio, do fajnego szmaku.
5. Trzeja durś go wachować jeszcze bez 15 min i przemiyszać, coby sie przesmożoł wszyndy tak samo. Jak już bydzie taki w som roz, to dociepać jeszcze ty jabka. Niy miyjcie strachu, że to tuste sie trocha łochłodnie bez ty jabka.
6. Dziynki nim tuste bydzie taki fajne miynkutki i troszka bydzie wykrziwiało gymba (po polsku to sie mianuje macerowanie) Bydzie to fertik kiej ty jabka bydom sie tak szklić. (Tak kajś po 15 minutach) Sztrom abo gaz wyłonczyć.
7. Nojlepij wloć go do buncloka, a jak ni mocie to do krauzy. Kiej wytyngnie idzie go maszkecić.
8. Szmarować nim chlyb, nojlepij tyż samymu upieczony.

Ty maszkety, kiere tukyj momy pokozane na łobrozkach, uwarziło dlo nos Pole do popisu. To je katowicko ekstra kuchnia w kierej nauczom Cie warzić tak, że żodyn Ci niy powiy że mu niy smakuje a ino bydzie jod aż mu sie bydom uszy trzyńść. Zapraszomy na http://poledopopisu.pl