fot. James M Thorne

Bamońcić to je po polsku mącić w głowie, zwodzić.

Dejmy na to, może zbamońcić synek dziołcha tak, że sie w nim zakocho tak fest.

Zbamońcić idzie tyż jak sie komuś jakich gupot nałopowiado i tyn w to uwierzi, chocioż to je niy prowda. Abo jak sie tyż wtoś pyto, kaj mo iść i sie mu powiy niyprowda, to go zbamońci. Czasym idzie kogoś zbamońcić niyświadomie.

Idzie bamońcić z roztomjatego powodu. Jak sie za dużo tych achtelików wypije abo jak sie pociśnie jakim ziołym i biere na chichrani.

Na starość idzie tyż bamoncić. Jak sie już mo swoji lata, zapomino ło beleczym i sie miyszajom niykiere rzeczy. Niy je tymu przeca winiyn, że łozprowio taki gupoty, niy je tego świadomy.

Idzie tyż bamońcić woda. Jak wtoś wloz do stowka i nojprzód była czysto, ale jak już wloz to jom zbamoncił, zrobiła sie tako kalno.

Je tyż czowiek bamontny, jak rano wstaje z wyrka i niy wiy kaj je i kiero je na banie.