fot. Rob Shenk

Rechtor to je po polsku nauczyciel.

Nazwa rechtor wziyna sie z niymieckigo recht i łoznaczo racja, prowda.

Pora lot do zadku tyn, wto był rechtorym mioł wieli powożani. Bajtle sie go słuchały i niy pochały za tela. Ja, robiło sie roztomajte gupoty, ale wszyjstko było z umiarym, pra? Ja, a jak sie co we szkole popochało, to sie w doma ale szmary potym łod łojca dostało.

Niykierzy godali, że rechtor to je jak farorz abo fojt. Jak sie ino go kaj spotkało, to sie syjmowało kapelka, ukłoniało sie mu i pozdrowiało.

Mo we gowie wiedza, beztóż traktowało sie go z szacunkiym. Łon tyż móg bajtlowi, kiej sie niy słuchoł, liniorzym abo jakim heftym po paluchach szczelić. Abo w tych myjszych klasach, jak sie co popochało, to stowało sie do konta.

A teroz rechtor ni mo takigo powożanio, jako to downij. Teroz musi dać wiynkszy pozór na bajtle, coby jim sie żodno krziwda niy dzioła i bróń Ponbóczku łod jakigo praśniyńcio po paluchach. Za to teroz i do haresztu może trefić.