fot. splorp

Duperszwance to som po polsku „rzeczy nieistotne, niepotrzebne”.

To som łonacydła inakszyj ty łone, tako drobnica, kiero niy wdycki mo swoje miano. Szło by jeszcze pedzieć gupoty abo rzeczy bez znaczynio. Trzimie sie je w doma, chocioż czowiekowi som niypotrzebne. Niyroz poświynco sie jakimś rzeczom czas, chocioż to niy przynosi żodnego pożytku.

Jak sie je wszyski wciepnie do jednego miecha, to to bydom ty duperszwance. Czy to bydom tajle do auta, abo do sprzontanio to abo do siebie abo dlo kogoś to bydom ty łone.

Dejmy na to jak jedyn malyż powiy do drugigo: „Przyniyś ty duperszwance”, to tyn drugi wiy, że rozchodzi sie ło pyndzel, wałek i inksze a niy przyniesie nudelkuli.

Jak sie mierzi pole i jak łostanom jaki cyntymetry, to sie jich już niy biere pod rozwaga, bo to som duperszwance. Ale dejmy na to jak sie mierzi jakiś elemynty do maszyny, kiere som ważne, to to już niy som duperszwance.

Zdo sie, że to je szpetne słowo, ale downij to było normalne coby tak godać. Chocioż je z tego miecha, co słowo „dupny”, toż niy powinno sie tak godać w eleganckim towarzystwie.