fot. Colby Stuart

Ajncla to je po polsku mieszkanie jednopokojowe, kawalerka.

To je tako mało izbetka, jedno pomieszczyni. Idzie w nim miyszkać na chwilka ale tyż na dłużyj.

Słowo wziyno sie z niymieckigo ”einz” czyli cosik pojedynczego. Nojwiyncyj ajncli było we starych familokach na górze. Miyszkali w nich nojczyńścij starsi, samotni, abo tyż młode kawalery, kierych niy roz niy było stykać na coś wiynkszego. Skisz tego, że wadziło im pora rzeczy, to sie przekludzali na swoji, do takij ajncli.

Jak młodzi sie żynili, to tyż nojprzód w nij miyszkali. Dopiyro potym szukali wiynkszego miyszkanio.

Starzikom niy było trza za wiela, toż przekludzali sie do ajncli. Łona jim stykała. I taki izbetki były tyż szykowane dlo nich.

Miyszkani we familoku to była izba ze kuchniom. Ale to już niy była ajncla.

W ajncli było wszyjsko: piec, szislong, stół, spani, jedzyni i wszyjsko inksze. Tam sie wydzieliło kusek placu, kiery sie zasłoniało i szło sie umyć i załatwić inksze rzeczy. Tam sie spyndzało niy roz cołki życi.