Fot. ToddMorris

Topek abo nachtop to je po polsku nocnik.

Nojczyńścij słowa nachtop używajom starsze osoby. Młodsi godali już topek.

Wyglondoł jak gornek. Od dołu był załokronglony. Mioł tyż jedyn uchwyt. A służył bajtlom do załatwianio piyrszych potrzeb fizjologicznych, ale niy ino bajtlom. Bo jak niy było w doma haźla i trza było lecieć na plac do wychodka, to łon był jak znaloz. Potym sie to wynosiło. I to było cołkiym normalne.

Dlo dziecek był taki specjalny nachtop. Taki stołek, kiery wkłodało sie pod siedzyni. I bajtel móg se siedzieć i robić roztomajte rzeczy, a jak zrobił co mioł zrobić to sie mu go wyciongało.

Terozki dzieci późnij uczom sie siadać na topki. A to skuli tego, że je wiynkszy dostymp do pieluch i ni ma takij potrzeby. Łojcom sie tyż z tymi sprawami niy śpiycho. Downij to miało znaczyni bo trzeja było prać cołki czas pieluchy. Toż lepij było coby nauczyć dziecko siodanio.

Downij ty topki były emaliowane i porcelanowe. Teroz som plastikowe kolorowe, grajonce. Zdaje sie, że som barzij wygodniyjsze niźli tamte.