fot. SCV Imagery

Na Ślonsku roztomajcie sie godo na mama: mamulka, muter abo mamiczka.

Niywtorzy godajom tyż maminka. To łostatni słowo je zapożyczone z jynzyka czeskigo.

Muti abo Muter godało sie w rodzinach, kaj dominowoł zwyczaj niymiecki. Ale niy zawdy tak było.

Na łojca godało sie zaś fater. Downij łojce cieszyli sie srogim autorytetym. Traktowało sie jich z wiynkszym szacunkiym niźli teroz. Godało sie tyż do nich barżij łoficjalnie.

W ślonskij rodzinie rzondził matriarchat. Głowom rodziny była matka. Łojciec w tym czasie szeł na szychta, toż niy było go w doma. Toż wszystki decyzje podejmowała matka.

Do łojców niy godało sie na ty. Na Ślonsku był zwyczoj, że godało sie im za dwoje  czyli używało drugij osoby liczby mnogij: „Mamulko podejcie mi tyn buńtek”. Czasym tyż godało sie za troje, czyli troiło sie. Dejmy na to godało sie tak: „Mamulko byliby tacy dobrzy i podali mi tyn buńtek”.

Teroz i w niykierych rodzinach bajtle godajom do swojich łojców po imiyniu. Co downij było niy do przyjyńcio.