fot. Anna Kowalczyk

Co mo spólnego pilot Oswald z Brytanije ze karminadlami? Abo jak poradziyć se ze somsiadkom, kiero je choby BBC- wiy kiedy kożdy chłop we wsi prziłazi łożarty, że Cila se dowała kuska z nowym szacym, że Hajoki zaś majom haja pewniykiym o geld? I czamu niy poradziycie sie na to łodpowiedzieć bez maszkecynio?

Ty łone rozwionżom sie zarozki, bo we lipcu, a konkretniyj jedynostego. Czamu? We Malarni we Tyjatrze Ślonskim bydzie zrychtowany taki tyjater, że palce lizać! I to dosłowni! Fest zdolno i wyzgierno Alina Moś- Kreger, jak kożdo ślonsko baba rada warzi, ale jako jedyno chce nom pokozać jak co złonaczyć- tak powstoł monodram „Rajcula warzy”.

Ale to niy bydzie taki zwykłe warzyni we tyjatrze. Tytułowo rajcula- szauszpilerka Joanna Wawrzyńska- łopowiy nom ło siedmiu nojlepszych daniach na Ślonsku. Mono Wos mierzi czamu akurat tako liczba? Łona sie z luftu niy wziyna- toć siedym potraw je dlo babów jak siedym grzechów. Jakby to wszysko wcisnyć na roz to idzie puknyć, a już nawet niy chca godać, że żić bydzie jak szrank! Kożdo tyż potrawa je zwionzano z inkszom łopowiastkom, niy zawdy świyntom. Wszyski te baje były zasłyszane za staryj piyrwy we kuchni, bo wiadomo, że jak omy parszczom, to muszom se do tego podżistać, a tyż przi warzyniu zawdy jakoś tak biere na wspominki.

Na tyn tyjater trza bydzie se wzionć jaki konsek kartki i blajsztift- chyba, że spamiyntocie wszyski receptury i Wom sie we łepie uleżom. Bydzie to tyż wyjontkowo łokazjo dlo niy – Ślonzoków- w takiyj piyknyj atmosferze nauczyć sie robić cołki nidziylny łobiod- razym z gymiklyjzami!

Zdradza Wom, co rajcula bydzie pichcić. Najsamprzód zupa z oberiby, czyli cosik dla kożdej kucharki, bo tako oberiba ciynżko zmaścić. Bydom krupnioki we szczewie fajnie wysmażone- to, co fatry nojbardzij maszkecom. Poznocie tyż knif do syrca chłopa- żur ze afrodyzjakami (baby, dowiecie sie co magicznygo ciepnyć do tyj zupy). Potym karminadle, rolada no i modro kapusta. Do tego kreple dlo przepadzitych i na sam koniec cosik dlo tych, co to wolom se siednyć na zicu i sie gorców niy chytać- czyli wodzionka!

Takigo czegoś jeszcze tyjater niy widzioł! Niy widza lepszygo sposobu na popołedni jedynostego lipca! To tyż bydzie przełomowo chwila, bo „Rajcula warzy”, kiero została wyróżniono we konkursie Imago PR na ślonsko jednoaktowka, je piyrszom pracom we historyji konkursu kiero bydzie wystawiono po naszymu. Nie mogecie tego przegapić! Łoboczcie konsek:

Tyjater: „Rajcula warzy”
Kiedy: 11.07.2014,

Ło kierej: 19:00

Kaj: Tyjater Ślonski w ramach Lata we Malarni
Po wiela:  20 złotków i idzie se jich sprawić tukej: www.teatrslaski.art.pl

My zaś som festelnie radzi, bo patronujymy tymu tyjatrowi! Toż do uwidzynio!