fot. Radosław Kaźmierczak

Pewno kożdy z Wos słyszoł ło czymś takim, jak bebok. A Ci kierzy niy wiedzom, to to zaroz sie dowiedzom, co to było za pierziństwo. I chocioż na tyn czas już sie wiela o nim niy godo, dobrze je go znać.

Mały bebok, wieli strach

Godo sie, że bebok mioł wele pół metra, potargane kudły i ni mioł szłapów, jak ludzie, ino kopyta. Taki bebok miyszkoł praje kole kożdyj chałupy, we chlywiku abo na górze, abo jeszcze w pywnicy. I jak sie go zawołało, zarozki przilecioł. Chocioż kożdy bajtel widzioł go po swojimu, to wiedzioł, że z takim bebokiym ni ma szpasu.

Praje jak Super Niania

A skuli czego bebok je przidajny praje jak terozki Super Niania? No pewno miarkujecie na co sie nadowoł. Jak dziecka w chałupie butlowały, pyskowały i wynokwiały, wtedy starzik abo starka otwiyrały dzwiyrze abo fynstry i wołali: „Beeeebok poć sam yno i bier za żić tego najducha i strupa pierońskigo, bo już sam niy idzie z nim strzimać! Zgupna sam przi nim! Bier go!”. Praje zawdy na taki wołani bajtle sie prościyły, trzimały dychani i ślypkami kukały z kierej strony przidzie ta maszkara. Idzie pedzieć, że flot dziecka trzimały sztima i były zaroz jak ministranty przi łołtorzu.

Dwa kamraty

Bebok tyż mioł kamrata, kiery spełnioł prawie taki same zadania jak łon. Na tego kompla godali utopiec. Tyn miyszkoł wszyndzi tam kaj sie szło bulknyć. Roztomańte krzikopy, stowki, rzyki to było królestwo utopca.

Czasym jak mały Zeflik abo Cila niy kcieli pucować zymbów i pychol mieli cały łobdrzistany, to starziki godały: „Bier ta byszta i szmaruj do badcimra, bo jak utopiec wylezie z ausgusa to sie niy pozbiyrosz! Wiela niy tfało, a bajtle leżały w swoich betach łobmyte, porzykane, z poczosanymi szkutami, przikrite pierzinom, aż po same uchole.

Trza postraszyć

Tak to widzicie było. Żodnymu niy świtała w palicy myśl, że taki straszyni dziecek bebokiym abo utopcym źle bydzie łoddziaływało na ich psychika. Rano bajtel stowoł, jod żymła z masłym abo ze swojskim leberwusztym, popił szolkom wrawego tyju i cis uradowanom gymbom na plac szpilować.