Ksionżka Najważniejszy rejs

Fest srogie fale niychronnie przechylały kadług wbitego we mielizna parowca "Stella Maris". Srogi wiater, mimo że gorki, niema wywracoł wybiegajoncych na pokład marynarzy. W końcu woda przedarła sie bez łodewrzone luki do środka statyku. Rozległ sie złowieszczy jynk giyntego i pynkajoncego kadłuba. Woda zalewała gorki kocioł, co groziło wybuchem. Niykierzy skakali do wody, inksi próbowali jeszcze spuścić szalupa, ino przi takich falach i wietrzy było to zaro skozane na porażka. Do pioskowego brzegu niy było daleko, we oddali było widać światła małyj latarni morskij Cidreira na brazilijskim wybrzeżu. 

Wiynkszo tajla załogi, bez kapitana, była już we wodzie, kiedy było słychać huk pynkajoncego kotła. Tajla statku uniosła sie do wiyrchu, choby po roz ostatnia chciała sie pożegnać ze nadodnym światem. Kadłub rozpod sie, z wody zaczły wypływać roztomajte tajla wyposażynio i moc drzewiennych podkładów kolejowych. Były one łostatnim ładunkiem ponadtrzydziestoletnigo parowca pod panamskom banderom, kiery mioł przywiyź je z brazilijskij Itajahy do Montevideo we Urugwaju. Czynść podkładów uratowała życie marynarzom, pozwajonc chycić sie, przeczekać burza i dopłynońć na brzeg. Inksze - zderzajonc sie w ćmoku - miażdżyły rynce i gowy. pechowców. Niykiere zaś uderzały o wystajoncy z płytkij wody kadłub i odłupowały płaty farby. Po pewnym czasie, spod poru warstw starej farby i rdzy, w świetle wschodzoncyj klary, tuż nad taflon spokojnyj wody, wyłoniło sie naszkryflane "CHORZÓW" 


Autor: Wojciech Dinges 
Miynko okładka
Wiela stron:  252 str.