M jak Maszkety
Nie znom chyba nikogo, wto by niy rod maszkecił. Do nikierych maszketym som zisty i bombony, do inkszych żymloki i leberwuszty. Jeszcze inksi zajodajom sie gymizami, mandlami abo kiszonom kapustom.
Maszkecić poradzi kożdy, ale już te maszkety zrobić – ni. Za bajtla to my wszyscy jodali to, co nawarziła starka abo mamulka, bo to tak nojczynścij było, że baby rzondziyły w kuchni. Zdarzoł sie nikiedy starzik abo tatulek, kiery umioł narychtować smażonka abo kapra na wilijo, ale chopy przi garach to wtedy – zdo mi sie – stoli rzodko.
Terozki troszka inaczyj to wyglondo. Warzom i baby i chopy. Po prowdzie trza pedzieć, że i tu i tu zdarzajom sie tacy, co przipolom i woda na herbata. Ale na szczynści moc je takich, kierzy majom grajfka do warzynio. I łoni chcom sie z nami dzielić swoimi przepisami, coby my se tyż mogli do gymby co dobrego wrazić.
Zowdy starka wszystki swoi przepisy trzimała w hefcie i potym wto tyn heft dostowoł w spadku. Terozki momy roztomańte ksiożki kucharski, cajtongi z recepturami no i internet. Beztoż do przepisów dostymp majom wszyscy a niy yno ci, kierych oma robiyła nojlepsze jodło we wsi.
Jako, że we Internecie idzie mieć swój wirtualny heft- blog, nikierzi swoji przepisy wciepujom na bloga. Warzom, kosztujom, poprawiajom, fyrlajom, robiom zdjyńcia i pokazujom, co tam wynokwili. Godajom z innymi ludziskami, co tam jeszcze idzie poprawić, żeby to było lepsze.
Czynść tych ślonskich blogerów połonczyli siły i zrychtowali taki cajtong, w kierym by szło poczytać po ślonsku ( i po polsku tyż) o ślonskim jodle. I tak powstoł magazyn „Maszkety”. Jak godajom ci, kierzy go robiom, chodzi niy yno o jodło, ale tyż o to, żeby promować to, co piykne w naszym regionie – ślonsko godka i ślonski tradycje. Idzie tyż tam poczytać o tym, co sie ciekawego dzieje w tym naszym małym świecie i w tym trocha wiynkszym. Czego se niy poczytosz, to se łobejrzysz, bo w „Maszketach” zdjyńcia som przepiykne. Na razie ni ma wydanio na papiorze, trza se to łobejrzeć w komputerze, ale momy fest wielko nadzieja, że to sie niyskorzyj zmiyni. Czekomy nieciyrpliwie!
A magazyn „Maszkety” idzie se łobejrzeć tukej:
https://www.facebook.com/maszketymagazyn
http://issuu.com/magazynmaszkety
Co byś na to pedzioł?