fot. Joe St.Pierre

Wynokwianie Kadłubka – czyńść 11.

Frelki som roztomańte

Frelki możecie łoboczyć pod ziymiom na Guido. Zjyżdżo sie szolom w kierej je cima i mało placu, czego nikerzy niy poradzom strowić, na 320 metrow i za chwila już som frelki. Prawia o tyjatrze „Frelki”, kery złonaczył Marcin Gaweł. Po cimoku pod ziymiom lotajom Frelki i godajom roztomańte rzeczy, a do tego śpiywajom i tańcujom. Ale przeca frelki idzie trefić niy yno w Zobrzu i niy yno na grubie. Frelka idzie trefić ledy kaj, jak sie mo trocha szczyńścio i odewrzone łoczy. Frelka, tako szwarno i gryfno treficie w cugu, na drodze, w bance i w doma. Frelka wyróżnio sie tym od inkszej płci piyknyj, że je frelkom.

Jaki som frelki?

Ślonske słowo „frelka” je od nimieckigo „Fräulein”, kere znaczy panna abo paniynka. Frelka to zdrobniynie od słowa „frela”– frela to już dziołcha fest dojrzało i na wydaniu. Frela to już ni ma dziołszka. O niy! Z frelom ni ma co! Z frelkom jeszcze idzie se pobłoznować – z frelom niy!

Ale som tyż frelki fest frechowne, tak sie zdarzo. Niy chca bezto pedzieć, że som one niy echt. Niy! Jakby to pedzieć: one som… cały czas wysztiglowane, choby szły na jaki chyt. Poradzom wejrzeć ci prosto w łoczy i śmioć sie do bele kogo. Kaj to chytły? Niy poradza pedzieć. Możno z telewizora? Możno z „Tańca z gwiazdami”? Te frelki wiedzom, czego chcom i to ni ma teke złe, musicie mi wierzić. Jake czasy, take frelki.

Lepszo dziołcha niż frela?

Coroz rzodzij sie godo: To je moja frela. Pryndzyj: To je moja dziołcha. „Frela” możno brzmi staromodnie. Ale chca wom pedzieć, że ni ma gańba pedzieć o gryfnyj dziołszce, że je frelom abo frelkom. Kożdy synek filuje za fajnom frelkom i myśli w swojij gowie, w gowie, kero pomału traci: „Ta frelka mo szik!”. Ale potym, jak już do nij zagodo, do tyj szykownyj frelki, niy godo już „frelka”. A przeca „frelka” brzmi po ślonsku lepij niż „girl”.

Prof. Uś dr hab. Zbigniew Kadłubek – rezkiruje Katedrom Literatury Porównawczyj. Je filologiym klasycznym, eseistom i tłumaczym. Pisze tyż po naszymu, dejmy na to „Listy z Rzymu” abo   „Promytyojs przibity”.