Zorty babów - klachule, rypule i inksze - Kultura - gryfnie

Zorty babów – klachule, rypule i inksze

fot. Ben Raynal
fot. Ben Raynal

Piyrwy godali, terozki godajom i bydom godać chyba durch, że chop baby niy zmiarkuje. Beztoż my naszykowali taki mały ślabikorz, w kerym znojdziecie nojważniyjsze zorty babów. Jak my ło czymś zapomnieli, to dejcie pozór i nom spomnijcie.

1. Klachula, klyta

Tako baba zno myśla kożdy. U nos na Ślonsku to łona pilnuje żeby jyj fto niy bichnoł fynsterbretu spod łokci. Nikiedy tyż stoi na siyni, przi kukloku abo klopsztandze, choby miała tela tepichów do wyklupanio. Stoi i fulo. Wiy wiyncy niż ksiondz co siedzi w suchatelnicy. Jak sie wtoś chce dowiedzieć co robił jego kamrat abo baba czy chop, to łona mo w gowie taki heft, w kerym trzimie kożdo historyjo, tyż ta, kero jest blank bojkom.

2. Rajcula

To je tako klachula, kero jeszcze do tego niy do sie przegodać. Łonyj idzie godać do lacia, bo i tak wiy lepi, myśli że pozjodała wszyjstki rozumy.

3. Synczora

Tako to mo durch kajś strupy, plynckerze, potargane wosy, szatow niy łoblecze bo jom cisnom, a kromfleki jom bodom. Za to rżnie w szkata przi piwie, umi bele co zmajstrować i durch loto z jakimś wihajstrym. To je tako baba-chop.

4. Maszketno

Jak poznocie maszketno dziołcha to miarkujcie, bo możno sami co pomaszkecicie. Tako mo zawsze w bifyju jakiś bombony, zista abo szokolada. Ale dowejcie tyż pozór bo może być przepadzito i niy mieć haltu i jak przidziecie ze szychty, to już żodyn karminadel niy łostanie na talyrzu. Tako baba może tyż być zachciywno i wynokwiać roztomajte dinksy, takie kere jedzom auslyndry, abo kere sie tak mianujom, że ani wypedzieć tego niy poradzi.

5. Wyzgerno

To je tako, kero umi robić byle jakie kopyrtki, yntki, ale tyż umi wypokopić jak coś zrobić na zicher. Mało, że szlangowito, to jeszcze mondro w pierony!

6. Zowitka

Tako baba je już mamulkom, ale ni mo chopa. Mo durch coś na gowie, a na wszystko jyj i tak styknie czasu. Czasym łazi zmierzło, ale jak sie dychnie to zaś nazot przaje wszyjskim i je fertig do roboty.

7. Motyka, raszpla, heksa

Łod takich to nojlepi zarozki pitać. To som baby zmierzłe, łoszkliwe, a jak sie wnerwiom, to z nudelkulom po chałpie lotajom.

8. Rypula

To je tako baba przi sobie, kero mo na czym siedzieć. Pod górka sie kulo pomału, a z górki trocha warci. We banie jak siednie to na drugim zicu ni ma już do nikogo placu. Ale jak to godajom: kochanego ciała nigdy ni ma za wiela!

9. Wrazidlato

Wiy wszyjsko co kaj wto mo schowane. Wysznupie łostatnie kotloki we fuzekli, libesbrify łod były libsty i gyszynk na geburstag. Wejrzy do mobilnioka bez ramionczko i łobejrzy czy kajś na kraglu niy łostoł cudzy lipensztift.

10. Rozbestwiono

Jak jom fest łojce rozbestwili, to sie bydzie myśleć, że kożdy tak musi. Chciałaby nic niy robić, kupować klajdy i szmukcojgi (ale niy za swój gelt), jeść, leżeć na szeslongu i drzimać. Trza jij durch godać, że je piykno, mondro i że sie jij przaje.

11. Frechowno

Tako co sie roztopiyrzo, robi larmo kole siebie, czasym jak coś powiy, to idzie łostać pof. Jak sie z kimś chyci, to mu nazdo nawet choby fulała ku szkubaczce. Mo fest szpicato godka i niy mo strachu przed żodnym.

12. Bamontno

Wyglondo choby zarozki miała sie kipnońć, durch łazi choby jom w nocy fedra z madraca cisła. Mo ruła i dwa kolana, wszyjsko robi pomału i blank pomału, mo czasu jak marasu. Jak sie jij koże co zrobić, to zanim sie pokapi ło co łazi, to warci sie to człowiek som zrobi.

13. Spolegliwo

Blank inkszo niż tako frechowno napasztliwo baba. Ło nic sie niy ciepie, niy gorszy, jom próbować szterować to je darymny futer, bo i tak sie niy łościepie. Co sie jij powiy, to zrobi.

14. Zgniyło do roboty

Niy nawarzy, niy posprzonto, wszyjsko łostawio „na zaś”. Niy ma to na pewno robotno baba, tako umi sie szanować. Zgniyło baba to je trocha ciarach, a jak jij sie niy chce pazurow pomalować, łoblyc do porządku ani dałerweli zrobić, to łazi taki bebok po chałpie we morgynmantlu i papuciach i niy wystawio nosa za futrzina.

15. Szpotlok

Trza dować przi nij pozór i na siebie, i na nia, bo umi sie łobalić na prosty drodze. Niy widzi borsztajnu, szłapy jij sie motlajom, szolki lecom z rynki, wszyjsko we chałpie łobczaskane, a łona sama mo wszyndzie buły i ojle.

16. Zmierzło

Durch coś jij niy pasuje, coś jom boli abo szteruje. Roz za wielko hica, roz za fest ciongnie z dworu zimno. Bez tydziyń boli jom gowa, w sobota za dużo roboty, a w niydziela to musi dychnońć, bezto niy idzie z niom pogodać.

17. Skowyrno

Na koniec łostały nom nojfajniyjsze baby. Wszysjkie szumne, wyzgerne, wysztiglowane i sztajfyry. Takich babów je pełno i z tego trza sie radować. Wszyjskie te lukate, ryże, ciymne, z dugimi i krótkimi nogami, modrymi abo zielonymi łoczami. Łobleczone fajnie, we fiuchatych szatach, abo we galotach. Take, kerym by sie chciało zarozki dać kusika, a jak sie na nich wejrzy, to mo sie hercklekoty. Takie baby niy zrobiom gańby, z nimi sie idzie i dychnońć i potańcować i pogodać i poleżeć po cichu na dece na trowie. My wiymy, że baby som ino gryfne!

  • 12.07.2015

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.