fot. photofarmer

Nastały taki czasy, że człowiek sie niy narobi jak nasze starziki. Już praje żodyn terozki po polu niy loce ze kopaczkom, żeby se na łobiod nakopać kartofli, bajtle niy pasom gowiedzi, a krowa widzom jedynie we Simsach. Godo sie, że momy beztoż życiowo laba, bo niy trza sie tela nabakać. Ale mo to tyż swoi złe strony- żerymy za fest i za tusto, a do tego żici nom sie niy chce dźwignyć sprzed telewizora abo komputera.

Jymy za dużo owiynzi i roztomańtych paskudów, a zamiast latym szkubnyć z krzoka wieprzków, to wolymy łotworzyć tytka ze czipsami. Dziecka już niy chodzom na raps do zegrody somsiodów na oberiba abo pozimki czy cześnie yno wolom łotwiyrać szekolada. Cołki nasz sport to yno sztreknyci se rano przed żdrzadłym i idymy do roboty abo do szkoły. Po połedniu zesel, „żołte” i cygareta. Tak daleko niy zajadymy. Je to możno wygodne, ale zdrowio na dugi lata nom to niy przyniesie. Bolom nos potym pukle, yno stynkomy, momy jakiś alergie abo inksze rymy. Jak tak człowiek siedzi to bas mu rośnie i yno umi narzekać i wynokwiać roztomańte problymy. Na to, żeby se trocha poruszać muszymy znejś trocha czasu i chynci!

Przeca idzie pojeździć na kole, znejś se jaki żabiok abo basyn do pływanio, poszpilać we paletki abo zwyczajnie podeptać po jakim parku abo zegrodzie. A jak już my som przi zegrodzie to se czipsy idzie zrobić ze marekwie, z kuloryby czy poszkubać świyntojanek. A wszysko to popić zeltrym (bo je fest zdrowo), yno niy zarozki po tyj zegrodowej uczcie, bo mogecie dostać drapszajs. A nojbardzij zdrowo je se brać to, co idzie po leku, niy nerwować sie byle gupotami. Wrzody Wom sie zrobiom we basie i żodyn zdrowy futer niy pomoże.