fot. Machina Group

Mode, gryfne, mondre i sie aszom tym, że poradzom godać. Dwie kamratki – Kasia i Paulina, złonaczyły  zajta Your Silesian Friends, na kerej łopowiadajom o tym, co trefiom. A to wszystko po ślonsku. Dzisio rozprowiomy z nimi o tradycjach, hajmacie i godce.

Skond pomysł na założyni bloga? 

Your Silesian Friends: Przijechałymy sztudierować do Katowic i zaczły my tyż sam robota i fajrowanie- to my zapoznały nowych kamratów. Czasym do wiców pedziały my coś po ślonsku- a oni fest mieli skiż tego szpas i dycki durś godali nom, co by my cosik zaczły z tom godkom majstrować, bo nom się fajnie udowało łonaczyć tradycyjo ze nowoczesnościom. Bestóż jak my pocisły na kolejno rajza autostpym, do Lizbony, założyłymy bloga na fejsbuku, zajta na instagramie i snapczata a zaczłymy publikować zdjyncia i filmiki z rajzy ze ślonskimi akcyntami.

Jak to tak richtik wyglondo?

Z początku fest spontanicznie, terozki wyncyj planujymy i włażymy we wspołpraca z roztomajtymi ludziami, dlo przikładu tero fest pomogo nom Machina Group, kerzy robom do nos filmiki we studio i jeżdżom z nami majstrować reportaże na wydarzynia na Ślonsku. Dziynki tymu mogłymy sztartnonć z kanałym na Youtube. Piyrwy wciepywałymy zdjyncia rajzy, potym była pauza, a potym zaczłymy z nieprofesjonalnymi filmikami krynconymi mobilniokami, na kerych uczymy ślonskij godki- i to nom prziniesło sroge zainteresowanie, skuli kerego zaczły my mysleć o tym coroz to poważnij. We praktyce je tyż tak, że Paulina lepij czuje się przed kamerom, a Kasia wiyncyj pisze. Kożdo z nos mo pomysły i obie momy podobne podejście, som my przeca najlepszymi kamratkami- bestoż to tak fajnie hulo. :)

Co ludzie ło wos godajom?

Ludziom się to chyba podobo- angażujom się, na razie najbarzij na Facebooku ale tyż na snapczacie je spory odzew, a to je do nos iberaszung! Miałymy już kilka takich sytuacji, że nieznajome ludzie padali nom, że nos oglondajom- to boło fest miłe! Interesujom sie tyż media i roztmajte marki, to mono bydziecie sie mogli wnet obejrzeć nos we współpracy z inszymi lokalnymi działaczami.

Co dalij? Bydziecie jeszcze co wynokwiać?

Ja, tak jak my już godały, bydzie sie terozki dzioło co nowego niydugo. A bez lato rychtujymy zaś jakie rajzy, co by o naszym Ślonsku połosprawiać tyż w inkszych placach!

fot. Your Silesian Friends

Czym je dlo Wos Ślonsk i ślonsko godka?

Ślonsk to je do nos hajmat, to nie je yno kraina geograficzno, ale take meta-miejsce, inszke od reszty świata, surowe i piykne naroz. Skuli tego, iże Ślonsk je rejonym przemysłowym zrodziyła się sam specyficzno kultura i tradycyje, kere sie opierajom na pracowitości, konkretności, a w wizerunku rzeczy zwionzanych z regionym- we prostocie formy. Mom na myśli pewiyn minimalizm i praktycyzm, kery przyciongo do nos coroz to wiyncyj obserwatorów. Ślonsko godka to je jynzyk, kery łonczy ludzi, richtig! Jak kery poradzi godać to z automatu lepij sie z nim dogodujymy, bo to ciongnie za sobom roztomajte inksze sprawunki, nawet wartości. Ślonzok ze Ślonzokiym się dogodajom- tak to tyż boło jak się wyłaziło na plac do bajtlów abo jak się godało ze starzikami. A łoprócz tego, brzmiyni godki dowo szpas, bo sie trocha (stety-niystety) kojarzy ze środowiskiym robotniczym abo ze starymi ludźmi- toż jak my, mode frelki, godomy po ślonsku, to je to do niekerych blank śmiyszne!

Jaki mocie podejści do ślonskij tradycje? Trzimiecie sie ich wszystkich tak blank na zicher?

Fest szanujmy ślonskie tradycyje, cyniymy je, ale niy kożdo kultywujymy. Dlo przikładu- w naszych chałpach co niydziela je ślonski obiod: kluski, rolada a modro kapusta- ale jak som my poza chałupom to nie sznupiymy ekstra za knajpami, w kerych nom takie danie zaserwujom. Pizza we niydziela to tyż je przeca szpas! Na łamach YSF chcymy połosprowiać trocha ło tych tradycjach, ale ku tymu pokozać tyż nowoczesne łoblicze Ślonska a Ślonzoków!

Chcecie łostać tu na Ślonsku? 

Przajomy rajzowaniu! Jeszcze my nie poradziyły zwiedzić cołkigo świota, ani placów, kere richtig chcemy łoboczyć, toż ciynżko pedzieć, eli bydymy chciały sam łostać- dyć je jeszcze tela do łobejrzynio! Jakby my się wykludzały to przeca na zicher bydymy tynsknić za naszym hajmatym a czynsto sam zaglundać!

Wejrzijcie video, kere zrychtowały te dwie frele:

Kaj Wos idzie trefić – łobejrzeć, posłuchać, poczytać?

Idzie nos znejść na Facebooku (Wejrzij), Instagramie (Wejrzij),  i Snapchacie (silesianfriends). Od niydowna som my tyż na YouTube (Wejrzij) i myślymy terozki o jakim blogu, co by pisać teksty.