Szpikole a starziki - Kultura - gryfnie

Szpikole a starziki

fot. xflickrx
fot. xflickrx

 

Kiej momy 20, 30 ,50 abo 70 lot na karku, to inakszyj zaglondomy na ty same rzeczy. Jak sie je młodym, to cołkiym inakszy podziwo sie na świat i to, co w nim nos trefić, niż jak sie już mo siwki na gowie i brozdy na licach i czole. To, co sie szpikolowi wydowo proste, do starzików je poszmatłane. Na to sie szumnie godo „wojna pokoleniowo”, a to je właśnie nic inkszego niż to, ło czym godom.

Za modymi ciynżko nadonżyć

Bo weźcie se tako do przikładu sprawa: „Starka, wczorej żech kupiyła bilet bez neta za 250 złotków i leca za dwa dni na tydziyń na Majorka”- tak godo wnuczka swojij omie. A oma? Oma niy poradzi tego zeształnować, że za tako cyna tak drabko i bez żodnych cyrków z rychtowanim rajzy pół roku pryndzyj do sie lecieć fligrym na drugi koniec Europy. Że niy trza mieć pochowane na klacie we bojtlu uszporowanych piniyndzy. Sie siodo do fligra i sie leci. Amynt.

Nowomodno robota

Dali kiejby sie tak podziwać to wszyjsko to, na co sie godo „nowoczesne nośniki elektroniczne” to je do starszych czorno magia. Tablety, smartfony- tego sie ani starka ani starzik niy chyto, bo mo strach, że tam co zmaści abo popsuje. Opa niy spokopi, że idzie do przikładu swoja robota kludzić bez internet i to na etat! Idzie zarobiać na życi i nic w tym już niy dziwuje. Łon jak sie niy narobiył, niy nafachlowoł hercówom abo niy ślynczoł w biurze nad papiórskami i kalkulatorym to niy zarobiył. I tam mu możecie godać: „Taki czasy”! On swoi wiy i niy traktuje tak waszyj roboty, że je na zicher i na lata.  Za woda abo gaz woli zapłacić na poczcie, swoi odstoć, nagorszyć sie, bo długo raja, ale ło żodnym internetowym banku niy kce słyszeć.

Słuchej sie starki!

Starziki swoi wiedzom, bo swoi przeżyli i wolom chuchać na zimne, żeby sie na czymś niy dać łocyganić. No przeca niy wszyjscy tacy som, ale docie mi recht, że wiynkszość naszych kochanych starzików i starków tak robi. Wort je łod czasu do czasu starki posłuchać, dać se przegodać, że trza łoblyc spodnioki, mycka i szal. I jakla tako za żić łoblyc. Dziołchy terozki coby piyknie wyglondać, żeby sie poasić, depcom po mrozie ze łodkrytymi nyrami. A potym kucajom i majom ryma. I kto sam mo recht? Starka!

  • 31.01.2016

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.