Roz, dwa, trzi... szałot maszkecisz Ty! - Kultura - gryfnie

Roz, dwa, trzi… szałot maszkecisz Ty!

fot. Steven Depolo
fot. Steven Depolo

Ale by sie tak zmaszkeciło taki swojski szałot, radiski, oberiba, abo sznitloch. Ale kaj człowiek ino wejrzy tam wszyjstko z Włochów abo Hiszpanije. Ni ma co tych nafilowanych prochami gymizów brać. Trza se zrobić swoji. Je nojwyższy czas…

Idzie wiosna

Bo zima sie już mo ku końcowi. Idzie wiosna, a wiosna to je taki czas, kiej sie wszystko budzi do życio. Trowa, kero po zimie mo barwa raczyj tako zmazano-brunotno, zaczyno sie robić ziylono. Zaczynajom sie pokazywać liście na drzewach i kwiotki na miedzach. Robi sie kolorowo i blank gryfnie. Aż sie człekowi chce wylyź na szpacyr i na to wszystko pozaglondać.

Trza sie wzoś do roboty

Nikierzy sie zaczynajom uczyć jeździć na rolszułach, inksi sie zapisujom na chiński abo co tam se wymyślom. Tym, kierzy jeszcze nie wiedzom, coby szumnego zrobić na wiosna, godom: zróbcie se zegroda. Jak wto niy miyszko w chałpie i ni mo konska erdy, na kerym by szło co posadzić, to niych sie nie martwi.

Zawdy je doś placu

Styknie balkon abo nawet fynsterbret. Mogesz se co posioć w krzince abo papiyrzanych kubkach i tyż ci urośnie. Mono nie bydziesz mioł tego tela co ci z zegrodom, ale jo ci godom, lepsze to niż psinco.

Weź se to poleku

Nojlepszyj zacznij łod takich gymizów, kere rada abo rod maszkecisz. Jak nie lubisz szałotu, to po kigo grziba miołbyś go sadzić? Wybier se to, co ci smakuje – tomaty, sznytloch, radiski abo blumkol. Nie bydź przepadzity i nie sodź za dużo, bo nie przidziesz przi tymu durch. Poczytej trocha o tym, jako musisz mieć erda, czy to mo na to klara fest grzoć, czy lepszy to skukać w ciyniu. Dej se tyż pozór, co moge rosnyć cołki czas w doniczce, a co trza przeflancować do ziymie, co byś potym ni mioł problymu. Jak już sie zdecydujesz, to ciś do gyszeftu po ziorka do wysiywu. Pamiyntej tyż o giskanie, cobyś mioł jako te swoi flancki podlywać.

Dej tymu czas

Ni ma co cyganić – przi tym wszystkim bydzie trocha roboty. Trza se dować pozór, coby roślinki nie miały za sucho abo za mokro, za dużo ciynia abo za mało. Nikiere ci mogom kipnyć zanim z nich co urośnie, ale z tego, co sie ostoi, urosnom ci nojprzodniejsze gymizy. Takich dobrych nie znejdziesz w żodnym gyszefcie. A jak se pomyślisz, żeś se je som wyhodowoł, to ci bydom smakować trzi razy bardzij.

  • 14.03.2015

Co byś na to pedzioł?

Gryfnie Retro

Gryfnie Retro

Gryfnie prezentuje ledżinsy „Kaj sie ciśniesz?”. Nadowajom sie do roztomajtych szportów. Pasujom na kożdo rzić.