fot. Michał Michnik

Bajtle mogom mieć laba we szkole, sztudynty umiom pitnońć na baje jak niy chcom już suchać fulanio rechtorow, a starziki siedzom i dychajom na pynzyji. A co majom robić te boroki, kere durch jeszcze (abo dziepiyro) tyrajom do roboty? Ślonzoki tyż ludzie i chcom dychnońć, bezto muszom sie prosić ło urlop. Jak już dostanom te wolne to kożdy wymyślo se inksze uciechy.
Wiela ludzi na wywczasie, tela pomysłow, beztoż jak niy mocie jeszcze pomyślunku kaj rynce wrazić, to dzisiojki znojdziecie sam pora idyji, kere my wziynli niy z gowy, ino z życio.

1. Ślonzok na egzotycznych wywczasach

Wtoś mi roz pedzioł „jo cie wezna na egzotyczne wakacje – pojadymy na Chechło”. Kożdy  chyba był na Chechle, a jak niy tam to na Rogoźniku, abo Paprocanach. To je echt ślonski wywczas, jak sie mo wolne myni niż tydziyń. Biere sie badykostium, deka, madrac, sznity, tomaty, uwarzone jajca, zelter abo oranżada i ciśnie sie nad woda. Nojlepi jak je klara i jest nojwiynkszo ciźba. Larmo tam je pieronowe, bajtle pomiyszane tak, że już niy idzie zmiarkować kery je cudzy, a kery nasz, kaj niy kaj sie znojdzie i jakoś gadzina, kero wtoś wzion ze sobom, wtoś gro we bala, a inkszy wciepuje frelki rajn do wody. Po cołkim dniu czowiek je czyrwony jak fynsterbret na Nikiszowcu, ale kożdy jak je nazod w doma to je umordowany, ale rod. To je tako ślonsko egzotyka.

2. Fachman

Jak wtoś mo trocha wiyncy czasu niż łikynd, to trza już dować pozór, bo jak to je chop, to jak bydzie siedzioł za dugo na szislongu i podziwoł sie na gipsdeka, to może mu sie spomnieć, że trza by zrobić nowy ylzokel we antryju, abo wymiynić ausgus we kuchni. I może być tak, że jak baba przidzie ze roboty, to dostanie bioły goronczki jak łoboczy co tyn chop nawyrobioł i że zamiast chałpy mo werkcojg. To jest tako zorta hanysa, kery je fachmanym, nawet jak je fraj łod roboty.

3. Tyn, co jak dycho, to na zicher

Som tyż zaś zamiast fachmanow inksze hanysy – take, kere jak majom wywczas, to nic ich niy ruszy ze placu. Siedzom se na zegrodce, grajom w pyjterkarty abo szkata, czasym se wyciongnom jako radiska, abo serwiom wieprzki, a potym nazod na lygisztul. Takimu styknie, jak se basyn postawi na trowie, wszysko se weźnie po leku, łotworzy biksa z piwym i posucho jak mu handzlik nad uchym gwizdo. Jak to je baba, to możno se trocha posztrykuje, abo poczyto cajtung, a nojlepi jak se pofulo bez mobilniok i chyci trocha klary. Idzie tyż kupić woszt, zymft i żymły, sprosić kamratow i zrobić fojera.

4. Tyn co rajzuje choby gupi

Jak wtoś mo blank dużo czasu na wywczas, to jedzie fort miarkować cudze landy i frelki i karlusow u auslyndrow. To som tacy, kerzi niy umiom usiedzieć na rzici i muszom durch kajś furgać, lotać abo rajzować. Napakujom pełne kofry, zrobiom pełno zdjyńć knipsaparatym, a potym trza to łoglondać. „Sam my jedli takie wynokwiane nudle u takigo Włocha, a sam my sie norli we morzu, tukej my ciśli szifym, a sam je moja szwaja, a sam nasz bajtel”. Takie łoglondanie umi być tak duge, jak poł urlopu, bezto dejcie na takich pozór!

Jedyn lubi se legnońć, drugi porajzować, ale jedne co kożdy robi tak samo to to, że rzyko coby mu dyszcz niy slecioł na łeb, jak wylezie z chałpy i żeby baba niy zawrocała fest gowy, czy geltu styknie. Tak czy inaczy, egal co sie robi, urlop to urlop, piyrw trza go dostać! A na koniec wolnego kożdy se myśli „A jo tela rzeczy mioł porobić!” A prowda tako, że to co sie richtig zrobiło to dziura sie wysiedziało na szislongu! A Wy, jak  spyndzocie wywczas? Pitocie czy łostowocie sam? Lygocie, abo lotocie durch? A możno robicie mocka inkszych roztomajtych rzeczy?