fot. Radosław Kaźmierczak

Jak żech Wom już pisała pryndzy, ausdruków je cało moc. Jedne sie używo, jak sie z kimś godo ale ło tych już sam było. Som tyż taki, kere wciepuje sie w zdania, jak co łopowiadomy, jak komu bojomy. I tych je nojwiyncy.

Szpicato godka

Pora sam Wom kca przekozać. Jak ło godce, to łod ni zacznymy. „Godka ku szkubaniu”- to je taki bojani o bele czym.

Zaś jak kery mo łostry jynzyk, umi dopiyc złośliwościami, to godo sie, że taki najduch mo „szpicato godka”.

„Sagi w pokrziwach” i „Pierońsko ruła”

Kery słucho taki „szpicatyj godki” to pewnikiym bydzie sie ciepoł jak „sagi w pokrziwach”, czyli bydzie fest nerwowy, że do niego sie tak godo. No chyba, że mo „pierońsko ruła” i mu je ganz egal co i jako sie do niego godo i robi wszyjstko polekutku, niy śpiycho mu sie.

„Ni mo wszyjskich w doma” i „Czasu, jak marasu”

Może sie tyż jako łodkuć i takimu „szpicatymu” pedzieć, że „chyba ni mo wszyskich doma”, co łoznaczo, że chopek mo coś z łepom. Tako „godka ku szkubaniu” nojbardzi majom rade baby. Do tego zawdy majom „czasu jak marasu”. Robiom se kawa, noga na noga, „diobła huśtajom”(bujajom szłapom) i dżiszczom ło roztomańtych gupotach. A czy to Gryjta je jeszcze „do kupy” z Lojzikiym (to pewnie wiycie ło co sie chechle: czy som razym ze sobom).

„Miechym piznyty”

A Alojz? „Łon je chyba miechym piznyty”, bo z Gryjtom ciynżko tydziyń strzimać. Tyn gupielok se kce z niom żynić! „Piznyci miechym” onaczo, że sie je normalnie gupim. A to zaś ło tym, że  Neśka zowżdy „mo psinco”- czyli nic- w portomlu, a co dwa tydnie kupuje blank nowy klajd. To je tako babsko godka. Ło wszystkim i ło niczym. Taki „Mimry z mamrami”.

Takich ausdruków w godce dowo sie cołki czas i żodyn nad tym niy ształnuje. Tak sie u nas godo i tyla!