fot. Farrukh

No i widzicie, niywiela czasu minyło. Chojki, lampki i gołki som już pochowane a tukyj juzaś świynta Wielkij Nocy. Wiela z nos woli barzij czas Godów. Bo je fajny czas, śniyg, chojka, pełno gyszynków, moczka i makówki. Niy mogymy tak se myśleć!

Bo Wielkanoc je tak samo ważno i tak samo fajno! Przeca Jezusek, kery pokonoł śmiyrć, zaklepoł nom przez to plac w niebie, a to czy se tam znejdymy zależy już yno łod nos, czy z tego „angebołtu” skorzystomy.

Nic ino świyntować i sie fest radować!

Jajca już zmaszkecone, ino szkorupy połostawały, wonioncy woszt i baranek bez gowy abo zadku tyż już pewno niykierym łostoł. Wczora już niykiere bajtle jak szły ze świyncynio to już go napoczynały a potym tak poradziły tymi jajcami go poprzikrywać, że żodyn sie niy skapnył. I tyż niykierym Ponbóczek wczora poświyńcił ty dobroci, bo łoroz zaczło loć.

Hazok tyż już był! No toż łostoł nom ino dzisiyjszy dziyń  i  jutrzyjszy. Śmiergust! Przidom ku frelkom synki ze sikowkami, flaszkami, a i kiblami fol wody! Nikerzy przidom z parfinami, po kerych dziołchy siedzom we wannie pora godzin, żeby ta „intensywno woń” śnich ślazła!. Młodzikom za poloni, domy roztomańte bombony, szekulady i wafle. Jajec już mało kery dowo, bo tyż synki wolom zjeś jako milka niż żołtko na twardo.

Przi tym wszystkim, przi tyj uciesze, niy zapomnicie podziynkować Jezusowi, że mu se kciało tak fest mynczyć, by nom tyn wspomniany plac miyndzy janiołami narychtować. To nojważniyjsze! Alleluja!

No i dychnijcie se tam jako, bo we wtorek juzaś na szychta!